Sólveig Anna Jónsdóttir, formaður Eflingar, segir að ef Samtök fyrirtækja í velferðarþjónustu koma ekki með tillögu að lausn eða lagfæringu á mönnunarvandanum á hjúkrunarheimilum á fundi félaganna á mánudag mun Efling slíta viðræðum. Þá hefjist undirbúningur aðgerða í kjölfarið.

Þetta segir hún í samtali við mbl.is.

„Samn­inga­nefnd Efl­ing­ar hefur kom­ist að þeirri niður­stöðu, og það var ákvörðun sem við tók­um á föstu­dag­inn, um að slíta viðræðum og taka þá ákv­arðanir um allt sem að því fylg­ir,“ seg­ir Sól­veig Anna.

Fundur félaganna verður haldinn á mánudag hjá ríkissáttasemjara en deilunni var vísað til embættisins í síðasta mánuði.

Margir fundir haldnir

Eru það þá verkfallsaðgerðir sem verður farið í?

„Við munum þá halda áfram að funda hjá samninganefndinni og ræða auðvitað þá möguleika sem að við höfum en já, að sjálfsögðu þýðir það að ef viðræðum er slitið að þá hefst undirbúningur aðgerða.“

Sólveig Anna segir marga fundi hafa verið haldna vegna deilunnar og að samninganefnd Eflingar hefði hafið undirbúning fyrir viðræðurnar snemma í sumar.

Frétt af mbl.is

Vísa kjaradeilu til ríkissáttasemjara

Örfá hjúkrunarheimili sem uppfylli viðmið hjúkrunarfræðinga að störfum

Hvernig finnst þér andrúmsloftið vera, ertu bjartsýn fyrir fundinn á mánudaginn?

„Ég er raunsæ. Ég vona að sjálfsögðu að viðsemjendur okkar komi með eitthvað sem að er nægilega gott til þess að það sé þá hægt að halda áfram að vinna með þær hugmyndir. En fari svo að það gerist ekki þá erum við tilbúin til þess að gera það sem við getum gert til þess þá að nálgast lausnir í málinu.“

Segir hún málið vera risastórt og mjög áhugavert enda um að ræða langstærsta viðsemjanda Samtaka fyrirtækja í velferðarþjónustu. Um 2.300 manns séu í Eflingu sem starfi hjá hjúkrunarheimilunum og séu langstærsti hluti þeirra konur eða um 82,5%, að sögn Sólveigar.

Sífellt meiri ábyrgð sett á herðar Eflingarfólks

„Það eru til í það minnsta þrjár skýrslur, nú síðast Gylfaskýrslan sem kom út árið 2021, þar sem sýnt er fram á það með mjög skýrum hætti hversu vanfjármagnað þetta módel er og hversu raunveruleg undirmönnunin er,“ segir Sólveig og bætir við:

„Til dæmis er það svo að það eru örfá hjúkrunarheimili sem að ná að uppfylla viðmið hjúkrunarfræðinga að störfum og það meðal annars hefur gert það að verkum að sífellt fleiri störf, sífellt meiri ábyrgð, sífellt meira álag er einfaldlega sett á herðar Eflingarfólks til þess að geta látið hlutina ganga.“

„En að sjálfsögðu geta hlutir ekki gengið endalaust með þessum hætti og við ætlum ekki að skrifa undir fjögurra ára kjarasamning með mjög hófstilltum launalið nema að komið sé til móts við kröfur okkar.“

Tengdar fréttir

Kjaraviðræður

Fengið nóg af sviknum loforðum stjórnvalda

• Vilja efla heimildir ríkissáttasemjara
• Atkvæðagreiðsla hjá Afli um verkfall
• Alvarleg staða og erfið hjá kennurum
• Vísa kjaradeilu til ríkissáttasemjara

» Fleiri tengdar fréttir

• Blogga um frétt