Innlent | mbl | 17.10.2024 | 11:08 | Uppfært 12:39

Erindi ríkisstjórnarinnar var komið á endastöð

Bjarni á Alþingi í morgun. mbl.is/Eyþór

Bjarni Benediktsson forsætisráðherra segir það hafa verið heiður að starfa með fráfarandi ríkisstjórn, sem hafi verið langlífasta þriggja flokka ríkisstjórn lýðveldissögunnar.

Beint: Bjarni tilkynnir um þingrof og kosningar

„Hér eru aðstæður ekki fullkomnar frekar en annars staðar en við stöndum sannarlega hvað fremst meðal annarra þjóða,“ sagði Bjarni á Alþingi, þar sem hann tilkynnti um þingrof og alþingiskosningar.

Hann sagði stjórnina hafa verið skipaða fólki sem hefði sameinast um að stuðla að framförum á Íslandi. Hún hefði meðal annars tekist á við heimsfaraldur, jarðelda og stríð úti í heimi.

Bjarni reynst óhæfur til að leiða ríkisstjórn

„Ég er stoltur af því hvernig við höfum virkjað samstöðuna margítrekað við Íslendingar þegar á reynir,” sagði hann.

Svandís Svavarsdóttir og Bjarni Bendiktsson á Alþingi í morgun. mbl.is/Eyþór

Þurfti að leggja framhaldið í dóm kjósenda

Bjarni nefndi að þótt ríkisstjórnin gæti gengið stolt frá borði hefði erindi hennar verið komið á endastöð. Hann hefði ekki séð annan kost í stöðunni en að leggja framhaldið í dóm kjósenda. Benti hann á að Íslendingar tilheyrðu aðeins 8% mannkyns þar sem svokallað fullt lýðræði væri til staðar. Því þyrfti fólk að vanda sig í komandi kosningabaráttu.

Hann hvatti þingheim til að nýta tímann sem eftir lifir af þinginu til að berjast fyrir áframhaldandi lækkun verðbólgu og vaxta sem skiptu fyrirtækin og heimilin langmestu máli um þessar mundir.