„Ég hefði gjarnan viljað að þessi stjórn gæti starfað áfram og lokið við fleiri verkefni, alla vega hvað snertir mitt ráðuneyti.“
Þetta sagði Ásmundur Einar Daðason, mennta- og barnamálaráðherra, þegar hann gekk inn á ríkisráðsfund á Bessastöðum í kvöld.
Ríkisstjórnarsamstarfi Vinstri grænna, Framsóknar og Sjálfstæðisflokksins lýkur með formlegum hætti á fundinum og tekur starfsstjórn síðarnefndu flokkanna til starfa en Vinstri græn kusu að taka ekki sæti í þeirri stjórn.
Inntur eftir því hvort hann sé fúll út í Bjarna Benediktsson forsætisráðherra fyrir að slíta ríkisstjórninni, eða telji Vinstri græn hafa gert mistök með því að hleypa af stað boltanum með ályktun sinni um að kjósa skyldi í vor, svarar Ásmundur neitandi.
Heppilegra hefði verið að klára samstarfið en svona séu stjórnmálin einfaldlega.