Tugir lækna til rannsóknar

Um er að ræða óvenjumarga lækna sem eru til rannsóknar hjá embættinu á sama tíma að sögn Jóhanns M. Lenharðssonar, sviðsstjóra á sviði eftirlits og gæða heilbrigðisþjónustu hjá landlækni. Í flestum tilfellum snúa málin að ávísun ávana- og fíknilyfja og flest koma þau upp eftir ábendingar sem leitt hafa til skoðunar á lyfjaávísun viðkomandi lækna.

„Þessi tilfelli eru þau sem eftir standa og halda áfram þegar búið er að vinna úr ábendingum. Sérfræðingar hér hjá embættinu, t.d. læknar, meta ábendingarnar og rannsaka þær,“ segir Jóhann.

Hann segir að þetta þýði ekki endilega að læknarnir megi eiga von á harkalegum úrræðum á borð við sviptingu starfsleyfis.

„Landlæknir hefur ýmis úrræði. Í fyrsta lagi að gera ekki neitt ef rannsóknin ber með sér að ekki sé tilefni til að grípa til úrræða en einnig að veita læknunum formleg tilmæli eða veita þeim áminningu ef svo ber undir. Algengara er að það sé gert frekar en að svipta fólk starfsleyfi,“ segir Jóhann.

Óvenjumargir til rannsóknar

Samkvæmt svari við fyrirspurn mbl.is til landlæknisembættisins hafa einungis þrír læknar verið sviptir starfsleyfi á árunum 2020-2024. Embættið gefur ekki upp hverjar ástæðurnar fyrir því voru vegna þess hve fá mál er um að ræða. Fram hefur þó komið í fréttum að eitt þessara tilvika snúi að lækni sem ávísaði lyfjum á látna konu í um áratug. Annað snúi að lækni sem talinn var framkvæma ónauðsynlegar aðgerðir á börnum.

Á sama tímabili, eða árin 2020-2024, fengu níu læknar áminningu en 43 formleg tilmæli frá embættinu. Þar af voru 14 sem fengu tilmæli vegna lyfjaávísana.

Hægt er að nálgast umfjöllunina í heild sinni í Morgunblaðinu í dag.