Ákveðið var á kjördæmisþingi Framsóknar í Suðvesturkjördæmi fyrr í dag að farið yrði í uppstillingu á lista fyrir komandi Alþingiskosningar. Báðir núverandi þingmenn kjördæmisins, Willum Þór Þórsson heilbrigðisráðherra og Ágúst Bjarni Garðarsson, gefa kost á sér í fyrsta og annað sæti listans.
Þetta staðfestir Guðmundur Birkir Þorkelsson, fráfarandi formaður kjördæmissambands Framsóknar í Suðvesturkjördæmi, í samtali við mbl.is. Hann segir engan ágreining hafa verið, hvorki um uppstillingu né efstu menn á lista.
Á laugardaginn eftir viku verður svo haldið aukakjördæmisþing þar sem endanlegur listi verður samþykktur.
Guðmundur Birkir lét af formennsku kjördæmissambandsins á þinginu í morgun og tekur Birkir Jón Jónsson, fyrrverandi þingmaður og bæjarfulltrúi, við keflinu af honum.