Þungbært að missa félaga

„Það er ekki ljóst á þessari stundu hvernig slysið bar að og sú rannsókn er í höndum lögreglunnar á Suðurlandi. Okkar helsta hlutverk núna er að taka utan um félaga okkar og veita þeim þann stuðning sem þeir þurfa á að halda,“ segir formaður Landsbjargar, Borghildur Fjóla Kristjánsdóttir, í samtali við Morgunblaðið.

Maðurinn sem lést eftir að hafa fallið í Tungufljót nálægt Geysi á sunnudag hét Sigurður Kristófer McQuillan Óskarsson og var formaður björgunarsveitarinnar Kyndils í Mosfellsbæ. Hann var við æfingu í straumvatnsbjörgun í og við Tungufljót þegar slysið varð.

Frétt af mbl.is

Björgunarsveitarmaður á æfingu lést við Tungufljót

Borghildur tekur fram að ef eitthvað kemur í ljós sem hægt er að bæta í verkferlum félagsins þá verði það gert. Slysið varð rétt fyrir klukkan fjögur á sunnudag. Straumvatnsbjörgunarmenn náðu Sigurði upp úr ánni og voru strax hafnar endurlífgunartilraunir á honum, en þær báru ekki árangur og segir Borghildur að um mikið áfall sé að ræða.

„Það er öllum mjög þungbært að missa félaga sinn á æfingu,“ segir Borghildur.

Hún segir að hugur þeirra hjá Landsbjörg sé nú hjá aðstandendum Sigurðar Kristófers og að slysavarnafélagið muni fyrst og fremst huga að líðan félagsmanna.