Þyrlan sótti slasaðan skipverja

Þyrlusveit Landhelgisgæslunnar sótti skipverja sem slasaðist á hendi við vinnu um borð í fiskiskipi sem var við veiðar norður af Siglufirði í gærkvöld.

Í tilkynningu frá Landhelgisgæslunni segir að áhöfn skipsins hafi haft samband við stjórnstöð Landhelgisgæslunnar, tilkynnt um atvikið og siglt í átt að Siglufirði. Við nánara mat á ástandi mannsins, og þar sem löng sigling var til Siglufjarðar og veðurspá slæm, var ákveðið að sækja hann með þyrlu.

Þyrla Landhelgisgæslunnar tók á loft frá Reykjavík um klukkan 19.30 og var komin að skipinu einni og hálfri klukkustund síðar en þá var skipið statt um 60 sjómílur norður af Siglufirði. Vel gekk að hífa skipverjann um borð í þyrluna.

Þyrlan lenti á Reykjavíkurflugvelli um klukkan ellefu í gærkvöldi og var maðurinn fluttur með sjúkrabíl á Landspítalann.

• Blogga um frétt