Endurskoða starfsleyfi bálstofu kirkjugarðanna

Heilbrigðiseftirlit Reykjavíkur hefur ákveðið að endurskoða starfsleyfi bálstofu Kirkjugarða Reykjavíkur.

Ástæðan er sú að mengun frá starfseminni er meiri en búast mátti við þegar leyfið var gefið út í júní árið 2021, að segir í tilkynningu frá heilbrigðiseftirlitinu. 

Að lokinni endurskoðun verður tillaga að endurskoðuðum starfsleyfisskilyrðum auglýst á vefsvæði Heilbrigðiseftirlits Reykjavíkur í fjórar vikur. 

Á þeim tíma getur hver sem vill sent Heilbrigðiseftirliti Reykjavíkur athugasemdir.

Skólar og leikskólar við sömu götu

Foreldrar barna á leikskólanum Sólborg, sem staðsettur er beint á móti bálstofunni, hafa ítrekað kvartað yfir mengun frá starfseminni og sent inn tugi kvartana til heilbrigðiseftirlitsins síðustu mánuði. 

Við sömu götu eru einnig Gulahlíð, frístundaheimili fyrir fötluð börn, og Brúarskóli; sérskóli fyrir börn sem eiga í alvarlegum geðrænum-, hegðunar eða félagslegum erfiðleikum.

Formaður foreldrafélags leikskólans Sólborgar, Matthías Kormáksson, birti myndband á Facebook-síðu sinni í morgun sem sýnir hvernig dökkan reyk leggur frá bálstofunni yfir svæðið í kring. Hann skrifaði einnig grein um málið sem birtist á Vísi í gær. Þar segir hann meðal annars að mengun frá starfseminni sé hættuleg heilsu barnanna sem andi reyknum ofan í lungun.

• Blogga um frétt