Ríflega fjórðungur pantað á Temu

28% eða ríflega fjórðungur þjóðarinnar hefur einu sinni eða oftar pantað vörur á Temu ef marka má könnun Prósents sem var gerð dagana 1.-12. nóvember.

15% þeirra sem svöruðu hafa pantað einu sinni af þessu kínverska markaðstorgi á netinu þar sem er að finna vörur á miklum afsláttarkjörum, sem að mestu eru sendar kaupendum beint frá Asíuríkinu.

9% svarenda hafa pantað tvisvar til fimm sinnum en öllu færri pantað oftar. 2% þeirra sem svöruðu hafa pantað sex til níu sinnum og önnur 2% hafa pantað tíu sinnum eða oftar.

Mikill meirihluti svaraði því til að hafa ekki pantað af Temu og hafa ekki áhuga á því eða 59%.

Frétt af mbl.is

Hefja rannsókn á Temu

Landsbyggðarkonur á miðjum aldri

Öllu fleiri konur hafa pantað (31%) en karlar (25%).

Flestir sem pantað hafa á Temu eru á aldrinum 45-54 ára eða 36%. 32% þeirra sem pantað hafa eru úr aldurshópnum 55-64 ára, 30% úr aldurshópnum 35-44 ára og 28% úr aldurshópnum 65 ára eða eldri.

Athygli vekur að í yngstu tveimur aldurshópunum hafa nokkuð færri pantað: 23% sem pantað hafa eru úr aldurshópnum 25-34 ára en aðeins 17% úr yngsta aldurshópnum 18-24 ára.

Þegar rýnt er í aðrar bakgrunnsbreytur má sjá að fleiri panta af landsbyggðinni en höfuðborgarsvæðinu. 32% svarenda á landsbyggðinni hafa pantað einu sinni eða oftar en 26% svarenda á höfuðborgarsvæðinu.

Ef menntun svarenda er skoðuð má sjá að flestir þeirra sem pantað hafa á Temu hafa lokið grunnskólaprófi eða minni menntun eða 32%.

Úrtakið var 2.500 einstaklingar 18 ára eða eldri úr könnunarhópi Prósents og var svarhlutfallið 50%.

• Blogga um frétt