Innlent | mbl | 19.11.2024 | 10:46

„Líf mitt er búið”

Steina Árnadóttir í dómsal í dag. mbl.is/Eggert Jóhannesson

„Ég er tóm skel. Ég er ekki í lífinu,“ sagði Steina Árnadóttir hjúkrunarfræðingur spurð af lögmanni hennar um hagi hennar í dag, rúmlega tveimur árum eftir að ákæra var gefin út á hendur henni um manndráp í opinberu starfi.

Aðalmeðferð í máli Steinu hófst aftur í dag eftir að sýknudómur Héraðsdóms Reykjavíkur var ómerktur af Landsrétti í apríl á þessu ári. Lagt er fyrir héraðsdóm að taka málið til meðferðar á ný og fella síðan á það efnisdóm. Héraðsdómi er meðal annars gert að meta hvort Steina hafi gerst sek um manndráp af gáleysi.

Frétt af mbl.is

Mál Steinu aftur í héraðsdómi

16. ágúst árið 2021 kafnaði sjúklingur inni á geðdeild 33A á Landspítalanum við Hringbraut í Reykjavík.

Samkvæmt ákæru er Steina sökuð um að hafa svipt sjúklinginn lífi, með því að þröngva ofan í hann innihaldi úr tveimur flöskum af næringardrykk þrátt fyrir að sjúklingurinn gæfi til kynna að hann vildi ekki drykkinn, allt með þeim afleiðingum að drykkurinn hafnaði í loftveginum, sem hindraði loftflæði um lungun og olli öndunarbilun og sjúklingurinn kafnaði.

Hafnar gáleysi

Dagmar Ösp Vésteinsdóttir saksóknari hóf skýrslutöku yfir Steinu á að spyrja hvort hún vildi bæta einhverju við fyrri skýrslutöku fyrir dómi í maí árið 2023.

Vilhjálmur H. Vilhjálmsson, verjandi Steinu, greip þá fram í og sagði að það væri ekki hægt að ætlast til að hún muni hvað hún sagði fyrir einu og hálfu ári.

Vilhjálmur H. Vilhjálmsson verjandi Steinu. mbl.is/Eggert Jóhannesson

Frétt af mbl.is

Vitnisburði ber ekki saman

Steina fór síðan yfir aðdraganda andlátsins sem samræmdist fyrri skýrslutöku sem greint var frá á mbl.is á sínum tíma.

Steina lýsti því fyrir dómi í dag að hún hefði verið yfirgefin af samstarfsfólki sínu á vaktinni er stóð í sjúklingnum og að „því miður“ var ekki hægt að bjarga sjúklingnum.

Steina hafnaði alfarið gáleysi í starfi.

Gerði allt í sínu valdi

Spurð af Vilhjálmi verjanda um hagi hennar í dag svaraði Steina að líf hennar væri búið.

Hún segist hafa verið kölluð inn í aðstæður sem hún vissi ekki hvernig byrjuðu. Steina segist hafa gert allt í sínu valdi til þess að bjarga sjúklingnum. Hún segist miður sín að „þetta skyldi enda svona“.

Steina sagði að það hefði verið skráð alls staðar að sjúklingurinn ætti að vera á fljótandi fæði, en grænmetisbiti stóð í honum er Steina kom að honum.

Ekki hluti af neinu

Í dag er Steina öryrki og hefur glímt við mikil veikindi, bæði líkamleg og andleg. Hún greindist með brjóstakrabbamein og fór í aðgerð vegna þess í febrúar.

Steina lýsti því að hún þyrfti á miklum stuðningi að halda. Systir hennar væri hennar stoð og stytta og þá hefði Vilhjálmur bjargað henni.

Steina sagðist ekki vera hluti af neinu í dag. Hún hefði lært sjúkraliðanám og hjúkrunarfræði á sínum tíma og alltaf haft það að leiðarljósi að hjálpa og bjarga fólki.

„Alla tíð reynt að gera hið rétta, en líf mitt er búið,“ sagði Steina á einum tímapunkti.

Skýrslutaka yfir Steinu tók rúman hálftíma og yfirgaf hún dómsal að henni lokinni. Verjandi hennar upplýsti dómara um að Steina væri á leið á geðdeild á Akureyri.