Forstjóri Samkeppniseftirlitsins segir að komin sé upp flókin staða í kjölfar dóms Héraðsdóms Reykjavíkur um að afgreiðsla búvörulaganna hefði verið í andstöðu við stjórnarskrá.

SKE hefur ekki tekið ákvörðun um hvort málinu verði áfrýjað en kjötafurðastöðvar sem vilja kaupa aðrar kjötafurðastöðvar skulu hætta slíkri vinnu að beiðni SKE.

„Þetta er bara flókin staða sem ekki bara við heldur neytendur, bændur og afurðastöðvarnar sjálfar þurfa að vinna út úr. Það þarf að gefa sér aðeins andrúm til þess að átta sig á því hvernig eigi að vinna úr henni,“ segir Páll Gunnar Pálsson, forstjóri Samkeppniseftirlitsins (SKE), í samtali við mbl.is um stöðuna sem upp er komin.

Frétt af mbl.is

Afgreiðsla búvörulaga í andstöðu við stjórnarskrá

Kjötafurðastöðvum ber að stöðva samruna

SKE sendi kjötafurðastöðum og samtökum þeirra bréf í dag vegna dómsins þar sem sagði að undanþágur sem voru veittar með lögunum – en kjötaf­urðastöðvum var meðal ann­ars veitt und­anþága frá sam­keppn­is­lög­um – væru ekki í gildi vegna dómsins.

Samkeppnislög gilda því fullum fetum um samstarf og samruna kjötafurðastöðva.

„Það sem við vildum gera strax er að gera þeim grein fyrir því að það væri hættuspil að halda áfram með aðgerðir sem byggja á þessum undanþágum sem núna er komið í ljós – samkvæmt dóminum – að höfðu ekki lagagildi. Við vildum koma því skýrt á framfæri. Það er að segja að allar aðgerðir, hvort sem þær líta að samruna eða samstarfi fyrirtækja, þá ber þessum kjötafurðastöðvum sem í hlut eiga að stöðva,“ segir Páll.

Frétt af mbl.is

Segir afurðastöðvum að stöðva aðgerðir

Eiga ekki að halda áfram

Fyrr í mánuðinum var greint frá því að Kaup­fé­lag Skag­f­irðinga (KS) hygðist kaupa fjöl­skyldu­fyr­ir­tækið B. Jensen sem rek­ur slát­ur­hús, kjötvinnslu og versl­un við Lóns­bakka, við landa­mæri Hörgár­sveit­ar og Ak­ur­eyr­ar.

Eru þið þá í raun að segja þeim að halda ekki áfram á meðan þessi dómur liggur fyrir?

„Já,“ svarar hann.

Frétt af mbl.is

Kaupfélag Skagfirðinga vill kaupa B.Jensen

Engin ákvörðun tekin um áfrýjun

Eftir stendur spurningin hvort að SKE muni áfrýja málinu. Sam­tök fyr­ir­tækja í land­búnaði fara til dæmis fram á það við SKE að mál­inu verði áfrýjað.

Hallist þið að því að áfrýja málinu?

„Það hefur engin ákvörðun verið tekin um það. Það er eitt af því sem við erum og þurfum að vega og meta ásamt með öðru. Þess vegna töldum við rétt líka að setja tilkynningu á netið hjá okkur, bæði til þess að leiðbeina og gera kjötafurðastöðvum grein fyrir því hvernig við lítum á málið á þessu stigi. Bæði gefa þeim og öðrum hagsmunaaðilum tækifæri til þess að koma sjónarmiðum á framfæri og svo sjáum við til hvernig teflist úr þessu,“ segir Páll.

Frétt af mbl.is

Nauðsynlegt að áfrýja dómnum

Ekki búið að taka afstöðu

Hlut­haf­ar í Kjarna­fæði Norðlenska hf. samþykktu til­boð Kaup­fé­lags Skag­f­irðinga um kaup á allt að 100% hluta­fjár í Kjarna­fæði Norðlenska hf. í júlí. Spurður hvað gerist núna um kaupin segir Páll:

„Það á bara eftir að taka afstöðu til þess. Það er eitthvað sem bæði fyrirtækin sjálf og síðan við í framhaldinu þurfum að taka afstöðu til eftir atvikum, en það er bara ekki tímabært núna.“

Frétt af mbl.is

Kaupfélag Skagfirðinga kaupir Kjarnafæði Norðlenska hf.

Hann kveðst ekki hafa neina skoðun á því hvort að dómur héraðsdóms hafi komið honum á óvart.

Í minnisblaði frá skrifstofu Alþingis til atvinnuveganefndar á sínum tíma kom fram að afgreiðsla búvörulaganna væri ekki í andstöðu við stjórnarskrá.

Tengdar fréttir

Bændur á Íslandi

Nauðsynlegt að áfrýja dómnum

• Dómur héraðsdóms án fordæma
• Segir afurðastöðvum að stöðva aðgerðir
• „Orðið erfiðara en áður að ná fram hagstæðum kjörum“
• „Þetta er auðvitað mjög alvarlegt mál“

» Fleiri tengdar fréttir

• Blogga um frétt