Innlent | mbl | 21.11.2024 | 3:53

Gosið gæti varað lengur: Meiri fyrirstaða í gosrásinni

Frá eldgosinu sem hófst á tólfta tímanum. mbl.is/Eyþór

Þorvaldur Þórðarson eldfjallafræðingur telur eldgosið sem hófst fyrir miðnætti ekki vera til marks um breyttan takt á Reykjanesskaga þó aðdragandinn hafi ekki verið nákvæmlega sá sami og síðast.

Hann segir að þó að gosið virðist nú aflminna en það sem braust út í ágúst sé það ekki endilega merki um að það verði minna. Mögulega muni þetta gos vara lengur en það síðasta.

Hann segir eldgosið í kvöld staðfesta það að gosrásarkerfið undir Reykjanesskaga sé enn virkt.

Hugsanlega hafi verið meiri fyrirstaða núna í gosrásinni en síðast þar sem lengri tími hafi liðið milli eldgosa sem þýðir að kvikan í gosrásinni sé orðin seigari. Þýðir það meiri fyrirstaða fyrir þá kviku sem er að reyna að brjóta sér leið til yfirborðs.

Frétt af mbl.is

Virknin náð hámarki: Hraun 500 metra frá veginum

Breytt mynstur?

Í tilkynningu Veðurstofunnar fyrr í kvöld segir að athygli hafi vakið að skjálftavirkni jókst ekki í aðdraganda gossins sem hófst í kvöld, ólíkt því sem gerst hefur í aðdraganda fyrri gosa á Reykjanesskaga.

Þá hafi þróunin undanfarna mánuði verið sú að það þurfi alltaf aðeins meira magn af kviku að safnast fyrir í kvikuhólfinu undir Svartsengi milli eldgosa til að koma næsta atburði af stað.

Kvikumagnið sem hafði safnast undir Svartsengi fyrir þetta eldgos var aftur á móti svipað og hafði safnast fyrir síðasta gos.

„Þetta er vísbending um að það munstur sem sést hefur hingað til í fyrri eldgosum er mögulega að breytast,“ segir í tilkynningunni.

Frétt af mbl.is

Beint: Eldgos hafið við Stóra-Skógfell

Svipað magn af kviku að safnast fyrir

Þorvaldur segir aðdraganda þessa eldgoss hafa verið mjög svipaðan og fyrir síðustu gos.

Hann bendir á að þó mælingar gefi til kynna að aðeins meira magn hafi safnast fyrir í geymsluhólfinu undir Svartsengi fyrir hvern atburð undanfarna mánuði þá hafi magnið sem safnaðist fyrir í geymsluhólfinu fyrir þetta gos verið mjög svipað og fyrir þau þrjú eldgos sem komu á undan.

Frétt af mbl.is

Kort af áætlaðri staðsetningu sprungunnar

Hægist alltaf á flæðinu

Eldgosið sem braust út í kvöld á Sundhnúkagígaröðinni er sjöunda gosið á svæðinu frá því í desember á síðasta ári.

Spurður hvort að þetta gos styrki hann í þeirri trú, að eldsumbrot muni halda áfram á Reykjanesskaga næstu mánuðina og jafnvel árin, segir Þorvaldur erfitt að svara því.

Lengri tíminn sem líði milli atburða gefi aftur á móti til kynna að það sé farið að hægja á flæði kviku úr dýpra kvikuhólfinu undir Svartsengi í það grynnra.

Ef flæðið í grynnra kvikuhólfið úr því dýpra fer undir þrjá rúmmetra á sekúndu þá gæti það stöðvast alveg sem gæti markað endalokin á þessari atburðarás. Útlit sé fyrir að við séum alltaf að nálgast þau mörk. Að mati Þorvaldar gæti það gerst eftir að eitt til tvö eldgos hafa liðið.