Verkfallsaðgerðir munu hafa áhrif á Sjúkrahúsið á Akureyri, en félagsmenn í Læknafélagi Íslands hafa samþykkt verkfallsboðun.

Verkfall skellur á á miðnætti aðfaranótt mánudags þann 25. nóvember, náist ekki að semja fyrir þann tíma.

Þetta kemur fram í tilkynningu frá Sjúkrahúsinu á Akureyri. 

Áhrifin helst á valkvæða starfsemi

Kemur þar fram að allri bráðaþjónustu verði sinnt en áhrif verkfalla verði helst á valkvæða starfsemi, m.a. á skurðaðgerðir og dag- og göngudeildarþjónustu.

Einungis verði framkvæmdar bráðaaðgerðir á meðan á verkfalli stendur, lyfjagjöfum krabbameinssjúklinga sinnt sem og þeirri göngudeildarþjónustu sem við verður komið.

Er skjólstæðingum sjúkrahússins sem eiga bókaðan tíma í skurðaðgerð eða á dag- og göngudeild bent á að fylgjast vel með að morgni verkfallsdaga hvort verkfall sé skollið á eða sé enn í gangi, sjúklingar gætu átt von á afboðun.

Vinnustöðvun:

• Fyrstu vikuna verða allir vinnustaðir lækna í verkfalli frá mánudegi 25. nóvember til fimmtudags 28. nóvember frá miðnætti til kl. 12 á hádegi.
• Næstu vikuna verða allir vinnustaðir lækna í verkfalli frá miðnætti til kl. 12 á hádegi þriðjudaginn 3. desember og fimmtudaginn 5. desember.
• Þriðju vikuna verða allir vinnustaðir lækna í verkfalli frá mánudegi 9. desember til fimmtudags 12. desember frá miðnætti til kl. 12 á hádegi.
• Í fjórðu vikunni verða allir vinnustaðir lækna í verkfalli frá miðnætti til kl. 12 á hádegi mánudaginn 16. desember og miðvikudaginn 18. desember.
• Hlé verður á verkfallsaðgerðum frá hádegi 18. desember til miðnættis aðfaranótt 6. janúar 2025.

Tengdar fréttir

Kjaraviðræður

Viðræður í Karphúsinu ganga misvel

• Fatlaður drengur fær ekki þjónustu í verkfalli
• Boða verkföll í fjórum skólum til viðbótar
• Börn hafi engan rétt á leikskólakennslu
• „Það er bara góð vinna í gangi“

» Fleiri tengdar fréttir

• Blogga um frétt