Þrátt fyrir að Svartsengislína hafi dottið út nú fyrir skömmu gekk vel að koma varaafli á virkjunina og þannig halda heitavatnsframleiðslu gangandi án neinna tafa. Þetta staðfestir Birna Lárusdóttir, upplýsingafulltrúi HS Orku, í samtali við mbl.is.

Virkjunin framleiðir meðal annars meirihluta heits vatns fyrir Suðurnesin.

Heita­vatns­fram­leiðsla í Svartsengi er háð bæði köldu vatni og raf­magni, en kalda vatnið kem­ur með lögn úr Lág­um, norðvest­an við Svartsengi og raf­magn kom með Svartseng­is­línu. Kalda­vatns­lögn­in er að hluta til í jörðu, líkt og heita­vatns­lögn­in sem lögð var að hluta í jörð í fe­brú­ar eft­ir að heitt vatn fór af stór­um hluta Suður­nesja.

Hraun hef­ur þegar runnið yfir báðar lagn­irn­ar, en Tóm­as Már Sig­urðsson, for­stjóri HS Orku og Run­ólf­ur Þór­halls­son, sett­ur sviðsstjóri al­manna­varna, eru bjart­sýn­ir á að þær lagn­ir haldi.

Svartsengislína datt út eftir að hraun frá eldgosinu rann undir línuna. Þrátt fyrir að hækkað hafi verið undir möstur línunnar fyrr í ár, þá olli gríðarlegur hiti frá hrauninu því að línan seig og sló að lokum út.

Hraun rann undir Svartsengislínu og olli gríðarlegur hiti þess því að línan seig og sló að lokum út. Varaaflsstöðvar í Svartsengi halda þó framleiðslu á heitu vatni þar áfram gangandi. Ljósmynd/Björn Oddsson

Tengdar fréttir

Eldvirkni á Reykjanesskaga

Hluti bílastæðis undir hraun: Ómögulegt að meta tjón

• Myndir: Hraunið komið inn á bílaplan Bláa lónsins
• Gosstöðvarnar ekki aðgengilegar fyrir ferðamenn
• Myndskeið: Stórbrotið útsýni af flugbrautinni
• Virknin dregist saman um 600 metra

» Fleiri tengdar fréttir

• Blogga um frétt