Innlent | mbl | 21.11.2024 | 23:37

Viðræður í Karphúsinu ganga misvel

Ríkissáttasemjari segir að samningafundir í kjaraviðræðum kennara og lækna muni halda áfram á morgun klukkan 13. Samsett mynd

Fundað var í allan dag í kjaraviðræðum kennara og lækna í Karphúsinu og eru samninganefndir beggja stétta boðaðar á samningafund aftur á morgun klukkan 13.

Þetta segir Ástráður Haraldsson ríkissáttasemjari í samtali við mbl.is.

Nefnir hann að í báðum deilum standi málin þannig að nú sé hópavinna í gangi sem leyft verði að þroskast í fyrramálið.

„Þegar maður er að vinna í svona samningum þá eru svona alls konar sérhlutir sem er skipt niður í einhverja parta og hópa,“ segir Ástráður.

„Stundum hangir framvinda heildardæmisins á því hvernig okkur reiðir af í slíkum minni hópum og þá er kannski minna að gera fyrir samninganefndirnar í heild sinni þegar slíkir hópar eru að störfum,“ bætir hann við.

„Fyrir tilviljun er í báðum þessum málum staðan þannig núna að við ætlum að nýta morguninn í slíka vinnu. Þannig að samninganefndirnar í heild sinni eru boðaðar báðar klukkan 13.“

Frétt af mbl.is

Á algjöru frumstigi eftir þrjár vikur af verkfalli

Viðræður kennara í hægfara gangi

Greint var frá því í dag að boðað hefði verið til verkfalla í fjórum skólum til viðbótar sem myndu hefjast 6. janúar næstkomandi.

Samtals hafa þá verið boðuð verkföll í sautján skólum, en þessa stundina eru kennarar í tíu skólum í verkföllum.

Frétt af mbl.is

Boða verkföll í fjórum skólum til viðbótar

Aðspurður segist Ástráður ekki viss um hvort frekari verkfallsboðanir hafi nokkur áhrif á andrúmsloft samningafundanna.

„Það náttúrulega eru verkföll í gangi og það er auðvitað aldrei gott en ég er ekki viss um að það breyti neinu hvort að skólunum fjölgi eitthvað, ég er ekki viss um það.“

Þá segir hann hægfara gang vera í deilunni og að það hafi ekki enn fundist flötur fyrir deiluaðila sem komi málinu almennilega af stað.

„Ég get ekki sagt að það séu einhverjar verulegar breytingar til batnaðar í því.“