Innlent | mbl | 5.12.2024 | 22:53

Völin og kvölin hjá Þorgerði Katrínu

Þorgerður Katrín Gunnarsdóttir hefur valið um það hvort hún starfar til vinstri eða hægri, segir Bergþór Ólason, þingmaður Miðflokksins, en hann telur að hún hljóti að staðnæmast við það hvort eindregin vinstribeygja komi flokknum vel þegar fram í sækir. Það geti reynst honum skeinuhætt.

Hann minnir á að það sé ekki útgjaldalaust að velja til vinstri þegar kostur er til hægri. Fylgisþróun Framsóknar í Reykjavík eftir að Einar Þorsteinsson gekk til liðs við vinstrimeirihlutann þar segi sína sögu og svipuðu megi halda fram um vanda Sjálfstæðisflokksins um liðna páska, þegar hann framlengdi ríkisstjórnarsamstarfið við Vinstri græna frekar en að taka tilboði um annað ríkisstjórnarmynstur á hægri væng.

„Ég ímynda mér að Þorgerður Katrín hljóti að vera að hugsa um hver lengri tíma áhrifin verða af því að fara í tiltölulega harða vinstri beygju,“ segir Bergþór í Dagmálum Morgunblaðsins í dag, en þar er rætt um úrslit og afleiðingar alþingiskosninganna um liðna helgi við hann og Líf Magneudóttur, borgarfulltrúa Vinstri grænna.

Þátturinn er opinn öllum áskrifendum Morgunblaðsins og horfa má á hann í heild með því að smella hér.

Bergþór telur að stuðningsmenn Viðreisnar með tengsl við atvinnulíf hafi ekki séð fyrir sér að þessi lykilstaða flokksins yrði nýtt til þess að mynda ríkisstjórn með Flokki fólksins og Samfylkingu.