Innlent | mbl | 22.12.2024 | 15:15

„Ókræsilegt veður“ yfir hátíðirnar

Reykvíkingar eiga von á suðvestanhríðaveðri og dimmum éljum á næstunni. mbl.is/Eggert Jóhannesson

Leiðindaveður verður á vesturhelmingi landsins yfir hátíðirnar en skárra verður það fyrir Norðlendinga og Austfirðinga. Reykvíkingar fá suðvestanátt með dimmum éljum í jólagjöf frá veðurguðunum.

Að sögn Þorsteins V. Jónssonar, veðurfræðings hjá Veðurstofu Íslands, mun hvassviðri sem spáð er í nótt ganga yfir í hádeginu á morgun en aðrar viðvaranir taka svo við annað kvöld, þá í kringum Vestfirði og Norðurland vestra og eystra.

Frétt af mbl.is

Suðaustan hvassviðri eða stormur í nótt

„Það gæti verið svolítið leiðindahríðaveður fyrir norðan annað kvöld,“ segir Þorsteinn og heldur áfram.

„Við biðjum fólk að keyra varlega ef það er að keyra á milli landshluta, einnig með vesturhelming landsins í nótt. Ef einhver ætlaði að taka daginn snemma á morgun þá er kannski betra að bíða eitthvað fram yfir hádegi með það, út af þessu hvassviðri sem er víðast snjókoma í nótt.“

Frétt af mbl.is

Vindhviður allt að 35 m/s

Leiðinlegt ferðaveður

Aðspurður segir hann leiðindaveðrið teygja sig yfir á aðfangadag á vesturhelmingi landsins og að von sé á suðvestanhríðaveðri.

„Aðfangadagurinn er svolítið þannig. Það eru engar viðvaranir komnar enn þá en þær gætu komið. Það verða svona mjög dimm él og leiðinlegt ferðaveður á suður- og vesturhluta landsins.“

Veðrið verði í lagi framan af deginum en muni svo versna með kvöldinu og verði orðið býsna leiðinlegt á aðfangadagskvöld og haldi þannig áfram á jóladag og annan í jólum.

Skánar helgina eftir jól

Hann segir hins vegar að von sé á lítilli úrkomu á Norðurlandi og Austurlandi og að þar verði veðrið skárra yfir hátíðina.

Á vesturhelmingi landsins fari svo að draga úr veðrinu á föstudag og mun veðrið lagast yfir helgina eftir jól þar sem fer að draga úr vindi og verður hann norðlægari.

„En fram að því er þetta svona ókræsilegt veður.“