Andlát: Egill Þór Jónsson

Egill Þór Jónsson, teym­is­stjóri á vel­ferðarsviði Reykja­vík­ur­borg­ar og fv. borgarfulltrúi Sjálfstæðisflokksins, lést á Landspítalanum við Hringbraut, í návist fjölskyldu sinnar og vina, að kvöldi föstudagsins 20. desember, 34 ára að aldri. Egill Þór hafði undanfarin ár háð hetjulega baráttu við krabbamein.

Egill Þór fæddist í Reykjavík 26. júní 1990 og ólst upp í Breiðholti. Foreldrar hans eru Jón Þór Traustason bifreiðasmíðameistari, f. 1960, sem lést 2013 af slysförum, og Díana Særún Sveinbjörnsdóttir leikskólaliði, f. 1961. Systkini Egils Þórs eru Linda Björk Jónsdóttir og Aron Örn Jónsson.

Egill Þór gekk í Hólabrekkuskóla, stundaði nám við Fjölbrautaskólann í Breiðholti og lauk þaðan stúdentsprófi árið 2011. Þá stundaði hann nám í félagsfræði og fjölmiðlafræði við Háskóla Íslands og lauk BA-prófi í félagsfræði árið 2015.

Hann helgaði starfsferil sinn fólki með fatlanir og geðræn vandamál. Hann var stuðningsfulltrúi í búsetukjarnanum Rangárseli árin 2015 til 2018 og teymisstjóri í Rangárseli frá 2016.

Egill Þór sinnti ýmsum störfum meðfram námi. Hann var í byggingarvinnu árin 2006 til 2007, var bréfberi og sinnti útkeyrslu hjá Íslandspósti 2008 til 2014. Hann var yfirmentor fyrir nýnema í félags- og mannvísindadeild Háskóla Íslands árin 2014 til 2015 og sinnti tryggingaráðgjöf hjá Tryggingavaktinni sumarið 2015.

Egill Þór var tryggur sjálfstæðismaður alla tíð. Hann var borgarfulltrúi Sjálfstæðisflokksins árin 2018 til 2022 og varaborgarfulltrúi frá 2022. Hann sat í ýmsum nefndum borgarstjórnar, s.s. í umhverfis- og heilbrigðisráði, velferðarráði, skóla- og frístundaráði, ferlinefnd fatlaðs fólks og öldungaráði. Þá sat hann í íbúaráði Breiðholts og íbúaráði Kjalarness.

Egill Þór var formaður Norm, félags félagsfræðinema við Háskóla Íslands 2013 til 2014, sat í Stúdentaráði Háskóla Íslands 2014 til 2016, sat í stjórn Stúdentaráðs, var formaður Vöku, félags lýðræðissinnaðra stúdenta 2015 til 2016. Egill Þór var formaður Varðar, fulltrúaráðs sjálfstæðisfélaganna í Reykjavík, 2023 til 2024. Hann sat í stjórn Krafts, stuðningsfélags ungs fólks sem greinst hefur með krabbamein og aðstandenda þeirra, 2020-2023. Þá var Egill Þór virkur í starfi Oddfellowreglunnar á Íslandi.

Eftirlifandi eiginkona Egils Þórs er Inga María Hlíðar Thorsteinson, f. 1991, hjúkrunarfræðingur og ljósmóðir. Börn þeirra eru Sigurdís, 3 ára, og Aron Trausti, 5 ára.