Rúmlega 80 jarðskjálftar hafa mælst í hrinu sem hófst við Eldey á Reykjaneshrygg í nótt. Ekkert bendir til að skjálftahrinan fari dvínandi. 

Tveir skjálftar yfir þremur að stærð hafa mælst á svæðinu, einn í nótt og annar upp úr hádegi í dag. 

Böðvar Sveinsson, náttúruvársérfræðingur á Veðurstofu Íslands, segir við mbl.is að skjálftahrinur séu algengar á svæðinu enda séu upptök skjálftanna á flekaskilum við Reykjaneshrygg.

Þessi hrina er þó öflugri en flestar sem orðið hafa á svæðinu undanfarin ár.

„Það er svona eins og þetta sé að aukast síðustu ár,“ segir Böðvar en bætir þó við að skjálftamælum hafi verið fjölgað á Reykjanesskaga vegna jarðhræringa síðustu ára, sem gæti skýrt fjölgunina.

Frétt af mbl.is

Stórir skjálftar á Reykjaneshrygg

Hrinan ekkert hætt

Aðspurður segir hann ólíklegt að eldgos sé að hefjast, en það sé þó erfitt að segja til um það. Það sé erfiðara að nema slíkt úti á hafi en eins og staðan er núna sjáist enginn marktækur gosórói á mælum Veðurstofunnar.

Um klukkan fjögur í nótt hleypti skjálfti 3,2 að stærð hrinunni af stað, að sögn Böðvars.

Hún virtist síðan hafa fjarað út þar til að annar stór skjálfti, 3,6 að stærð, blés nýju lofti í hrinuna. Nú hafa ríflega 80 skjálftar mælst á svæðinu síðasta sólarhring.

„Og mér sýnist hún ekki vera hætt þessi hrina. Hún er enn þá í gangi,“ segir Böðvar.

„Og þetta á eftir að aukast.“

Tengdar fréttir

Eldvirkni á Reykjanesskaga

Magnús Tumi stillir upp þremur sviðsmyndum

• „Við erum sátt“
• Yfir 200 skjálftar frá upphafi hrinunnar
• Yfir 140 skjálftar í „ekkert óeðlilegri“ hrinu
• „Reynt að gefa fólki sem mest frí“

» Fleiri tengdar fréttir

• Blogga um frétt