Mikið að gera í flugeldasölunni á Akureyri

„Þetta hefur gengið ljómandi vel. Allir rosalega glaðir og hlakka til áramótanna,“ segir Ingvar Már Gíslason í samtali við mbl.is.

Hann er meðal þeirra sem hafa staðið vaktina í flugeldasölu hjá björgunarsveitinni Súlum síðustu daga.

„Við erum rosalega þakklát fyrir stuðninginn og hversu vel okkur hefur verið tekið í sölunni. Það er mjög góður andi hjá félögunum í björgunarsveitinni Súlum,“ segir hann jafnframt.

Aðspurður segir hann marga hafa gert sér ferð og keypt flugelda hjá björgunarsveitinni í dag.

„Það var stappað frá því við opnuðum í morgun klukkan 9 og síðustu viðskiptavinir eru að labba út núna með bros á vör.“