Innlent | mbl | 3.1.2025 | 21:00

Telur að eldgosahrinan sé að fjara út

Ármann Höskuldsson, prófessor í eldfjallafræði við Háskóla Íslands. Samsett mynd/mbl.is/Eggert Jóhannesson

„Mér finnst þetta bara vera að róast og það er spurning hvort það sé ekki að koma að endalokum í Sundhnúkagígum.“

Þetta segir Ármann Höskuldsson, prófessor í eldfjallafræði við Háskóla Íslands, í samtali við mbl.is.

Sex eldgos urðu á Sundhnúkagígaröðinni á síðasta ári og í tilkynningu frá Veðurstofu Íslands í gær segir að nýjustu gögn bendi til þess að líkur á kvikuhlaupi og jafnvel eldgosi aukist í lok janúar.

Þar segir að hraði á kvikuinnflæði undir Svartsengi sé svipaður og fyrir síðasta eldgos, sem lauk 9. desember.

Frétt af mbl.is

Auknar líkur á kvikuhlaupi eða eldgosi í lok janúar

Ekkert í mínum gögnum sem hefur það til kynna

Ármann telur að eldgosahrinan við Sundhnúkagígaröðina sé hægt og bítandi að fjara út.

„Ég sé að menn eru eitthvað að tala um að það verði gos í lok janúar eða byrjun febrúar. Ég hef ekki aðgang að þeim gögnum en miðað við þau gögn sem ég hef er ekkert sem gefur það til kynna,“ segir hann.

Ármann segir að flekamótin séu að gefa eftir og það gerist ekki allt í Sundhnúkagígum, sem eru jaðarinn á Asíuplötunni. Hann segir að jaðarinn á Ameríkuplötunni eigi væntanlega eftir að svara líka og þá fari eitthvað meira að gerast þar.

Frétt af mbl.is

Magnús Tumi stillir upp þremur sviðsmyndum

Hann segir að ef það fari að draga eitthvað meira til tíðinda færi atburðarásin sig meira vestur á bóginn og nefnir í því sambandi Eldvörpin.

Goshrinan í Sundhnúkagígaröðinni hófst í desember 2023 og síðan þá hefur gosið sjö sinnum.

„Þetta hefur ekki oft gerst en við fengum sams konar hrinu í kjölfar Öskjugossins 1875 en þá komu sjö eða átta gos á stuttum tíma. Þetta er því ekki hegðun sem við höfum ekki séð,“ segir hann.

Greinilega mikið í gangi

Ármann segir að það sé greinilega mikið í gangi og samkvæmt þeim sögulegu upplýsingum sem liggi fyrir virðist sem allt Reykjanesið upp að Hengli fari í gang.

„Svo má velta því fyrir sér hvað er að gerast í Ljósufjallakerfinu. Við vitum að síðast þegar það varð hrina á Reykjanesinu urðu gos fyrir vestan og norður í Langjökli líka. Ef við miðum við gögn sem við erum nánast örugg um að séu rétt um gostíðni á landinu síðustu rúmlega 100 ár er eldgos á um tveggja og hálfs árs fresti. Þetta er eldfjallaeyja eins og við vitum flest,“ segir hann.