„Þessum hryllingi verður að linna“
Setja bókamerki
Ísland mun greiða framlög til Palestínuflóttamannaaðstoðar Sameinuðu þjóðanna, UNRWA, fyrr en áætlað var í ljósi gríðarlegrar mannúðarþarfar á Gasasvæðinu og segir utanríkisráðherra öruggt að framin hafi verið brot á alþjóðalögum á svæðinu.
Þetta kemur fram í færslu Þorgerðar Katrínar Gunnarsdóttur utanríkisráðherra á Facebook.
Segir hún ástandið á Gasasvæðinu óásættanlegt og sýna allar verstu og grimmustu hliðar mannlegs eðlis.
Alvarleg brot á alþjóðalögum verið framin
„Það er öruggt að framin hafa verið alvarleg brot á alþjóðalögum – jafnvel það sem okkur er tamt að tala um sem þjóðarmorð, en úr því fæst ekki endanlega skorið nema fyrir alþjóðadómstólum. Ég veit að íslensku þjóðinni ofbýður þetta ástand – og það sama á við um mig,“ skrifar Þorgerður og heldur áfram.
„Ég ræddi í dag við framkvæmdastjóra UNRWA, Philippe Lazzarini, og staðfesti við hann að Ísland mun greiða framlög til stofnunarinnar fyrr en áætlað var, í ljósi gríðarlegrar mannúðarþarfar. Ísland metur mikils það mikilvæga starf sem Lazzarini og starfsfólk hans inna af hendi við afar krefjandi aðstæður.“
Staðan óviðunandi
Þá ræddi hún einnig við yfirmann mannúðar- og uppbyggingarmála Sameinuðu þjóðanna fyrir Gasa, Sigrid Kaag, þar sem farið var yfir mikilvægi þess að komið yrði á vopnahléi, bæta aðgengi að mannúðaraðstoð og finna leið að lausn fyrir fólkið á svæðinu.
„Því staðan núna er óviðunandi.“
Hefur óskað eftir fleiri samtölum
„Það er mín einlæga trú að alþjóðasamfélagið geti gert meira og talað hærra - fyrir friði og fyrir fólkið sem býr við óhugsandi og grimmilegar aðstæður á degi hverjum. Þar getum við Íslendingar sannanlega orðið að liði. Við komuna í utanríkisráðuneytið einsetti ég mér að beita rödd minni hvert sem ég fer, í þágu mannúðar og frelsis,“ skrifar utanríkisráðherrann í færslu sinni.
Þá upplýsir hún að hún hafi óskað eftir fleiri samtölum við forsvarsmenn alþjóðastofnanna og ríkja sem koma að deilunni til að öðlast dýpri skilning á stöðunni, gera grein fyrir afstöðu Íslands og bjóða fram krafta landsins.
„Ísland stendur með saklausum borgurum og börnum sem líða fyrir þessar ólýsanlegu hörmungar. Þessum hryllingi verður að linna.“
Er Þorgerður Katrín skuggaráðherra fjármála?
Jón Gunnarsson aftur á leið inn á þing
Vegagerðin svarar ekki ásökunum
Jón tekur sætið: Kringumstæðurnar ekki gleðiefni
MDE tekur fyrir mál Gráa hersins
Reyna að styrkja stöðuna fyrir Trump
Tilbúin að leiða flokkinn en dagurinn snýst um Bjarna