Innlent | mbl | 7.1.2025 | 20:00

Með lögheimili í Lokinhamradal og aldrei búið þar

Hrafnabjörg 1 eru í eigu systranna Aniku Jónu Ragnarsdóttur sem er með 69% eignarhlutfall og Bergþóru Árnýju Ragnarsdóttur sem er með 31% eignarhlutfall. Samsett mynd

Eyjólfur Ármannsson, samgöngu- og sveitarstjórnarráðherra og oddviti Flokks fólksins í Norðvesturkjördæmi, er með lögheimili á afskekktum sveitabæ í eigu móður hans og fjölskyldu.

Enginn býr á bænum og sjálfur býr Eyjólfur í Reykjavík.

Hann hefur aldrei búið í Norðvesturkjördæmi.

Þetta staðfestir hann í samtali við mbl.is að ríkisstjórnarfundi loknum í dag.

Hér má sjá Hrafnabjörg. Mynd úr safni. Ljósmynd/Aðsend

Kveðst búa í Reykjavík

Eyjólfur er með skráð lögheimili að Hrafnabjörgum 1 í Lokinhamradal í Arnarfirði. Samkvæmt fasteignayfirliti Húsnæðis- og mannvirkjastofnunar eru þinglýstir eigendur móðir Eyjólfs og systir hennar.

Býrðu þar?

„Nei. Ég held ekki heimili. Það er tvenns konar. Annars vegar ertu með lögheimili í kjördæminu og heldur heimili og hins vegar eru þingmenn sem eru með lögheimili í kjördæminu og halda ekki heimili,“ svarar Eyjólfur en hann kveðst búa á Flókagötu í Reykjavík.

Kristinn Gunnar K. Lyngmo, deildarstjóri hjá Vegagerðinni á Vestfjörðum, segir að engin vetraþjónusta sé á veginum að Hrafnabjörgum, þar sem „það er enginn þarna“.

„Opnar svona í kringum júní,“ segir hann um veginn að bænum.

Staðsetning Hrafnabjarga á Vestfjörðum.

Aldrei búið í Norðvesturkjördæmi

Hvað er langt síðan þú bjóst í Norðvesturkjördæmi?

„Ég hef ekki búið þar,“ segir Eyjólfur.

Spurður hverjar tengingar hans við kjördæmið séu segist hann sem ungur maður hafa verið í sveit á Hrafnabjörgum. Var hann sendur í sveit hjá móðursystur sinni þar átta ára gamall og átti hann nokkrar þjóðlendur í kjördæminu.

„Gamall smali. Ég skrifaði greinar í Bændablaðið um þjóðlendumál og titlaði mig þá sem fyrrum smala í lokin og lögfræðing,“ segir hann og hlær.

Fær dreifbýlisstyrk

Alþingismaður fyrir kjördæmi utan Reykjavíkurkjördæma og Suðvesturkjördæmis fær mánaðarlega greiddar 185.500 krónur í húsnæðis- og dvalarkostnað í samræmi við lög.

Eyjólfur fékk slíkar greiðslur á síðasta kjörtímabili eins og allir landsbyggðarþingmenn.

Haldi alþingismaður, sem á aðalheimili utan höfuðborgarsvæðis, annað heimili í Reykjavík getur hann óskað eftir að fá greitt álag, 40%, á þá fjárhæð, en Eyjólfur hefur ekki þegið slíkar greiðslur.