Þórdís ætlar ekki að bjóða sig fram

Þórdís Kolbrún Reykfjörð Gylfadóttir, varaformaður Sjálfstæðisflokksins, ætlar ekki að bjóða sig fram til formanns eða til annarra embætta innan Sjálfstæðisflokksins, á komandi landsfundi flokksins í febrúar.

Frá þessu greinir hún í færslu á Facebook.

Í færslunni segir hún að öllum sé eflaust ljóst að Sjálfstæðisflokkurinn hafi ekki gott af innanflokksátökum eða hatrömmum flokkadráttum. 

Segir hún eðlilegt á þeim tíma þegar Bjarni Benediktsson sé að stíga til hliðar, en hún hefur verið með honum í forystu flokksins undanfarin sjö ár, að þær raddir sem hafi hæst kallað á endurnýjun fái tækifæri til þess að reyna sig og flokkurinn fái að velja nýja forystu. 

„Ég sækist því ekki eftir formennsku eða öðru embætti á næsta landsfundi,“ segir Þórdís í færslunni.

Ekki upptekin af tilteknum metorðum

Segist Þórdís ekki hafa sóst eftir embættum innan flokksins til að klífa metorðastigann. „Í pólitískri dægurmálaumræðu gera flestir ráð fyrir því að ég hljóti að vilja verða formaður í Sjálfstæðisflokknum þar sem ég hef ítrekað sagst telja mig vera færa um að gegna embættinu enda getur formennska í Sjálfstæðisflokknum verið verkfæri til að ná markmiðum fyrir Ísland. En það hefur ekki verið markmið í sjálfu sér; að það sem keyri mann áfram sé að „vinna leikinn“. Það er ekki sami hluturinn. Ég hef ætíð haft metnað til að sinna þeim verkefnum sem mér er treyst fyrir en ekki sérstaklega upptekin af því að ná tilteknum metorðum.“

Þórdís segist taka þessa ákvörðun með hjartanu og að hún líti inn á við til að spyrja sig hvernig hún geti best gert gagn. „Ég mun með stolti gera hvað ég get sem þingmaður í sterku liði undir nýrri forystu. Ég hlakka til að vera óbreyttur þingmaður á eigin forsendum - og hluti af liði. Í öflugum þingflokki með nýju og framúrskarandi fólki sem hlakkar til að spreyta sig og vaxa í nýju hlutverki. Ég hlakka til að vera frjálsari, fá meiri tíma til að lesa bækur og skrifa, rækta það að hafa skynbragð og skilning á því sem er að gerast í kringum okkur, og veldur mér raunverulegum áhyggjum.“

Tekur hún fram að hana gruni að það sem valdi henni raunverulega áhyggjum sé allt miklu stærra en einstaka innanlandsmál, hvað þá innanflokksmál.

Kjörin á þing með 12 daga gamla dóttur

Í færslunni rifjar Þórdís upp upphaf ferils síns í stjórnmálum og að hún hafi verið kjörin á þing tólf dögum eftir að hún fæddi dóttur sína og varð ráðherra þegar dóttirin var ekki orðin þriggja mánaða, en dóttirin er núna átta ára.

Segist hún hafa þroskast mikið og hratt og lífsskoðanir hennar mótast á þessum tíma.

Þá bendir Þórdís á að fullveldi Íslands hvíli á stoðum í alþjóðakerfinu sem geti riðlast. „Nú eru því tímar þar sem við þurfum að hyggja að því sem sameinar okkur en gleyma okkur ekki í því sem sundrar,“ segir hún.

Segir Sjálfstæðisflokkinn eiga mikið inni

Segist hún sannfærð um að mikið laust fylgi sé meðal annar hópa samfélagsins fyrir Sjálfstæðisflokkinn ef hann standi á bak við gildi flokksins og segir hún að fólk þurfi að hafa hugrekki til að forgangsraða og fækka verkefnum sem ríkið sinni til að geta betur ráðið við þau verkefni sem mestu skipti, sem sé öryggisnetið og samfélagsgerðin sem geri Ísland að landi tækifæranna.

Fréttin hefur verið uppfærð.

• Blogga um frétt