„Við erum ekki í neinu stríði við kennara“
Setja bókamerki
Sífellt fleiri foreldrar bætast í hóp þeirra sem stefna Kennarasambandi Íslands (KÍ), fyrir hönd barna sinna, vegna útfærslu verkfallsaðgerða sem foreldrarnir telja ólöglegar.
Kristófer Már Maronsson, þriggja barna faðir og einn úr hópnum, segir foreldrana hafa fundið fyrir miklum stuðningi frá því málið var gert opinbert og að fleiri bætist í hópinn á hverjum degi.
Ákvörðun um að stefna KÍ hafi ekki verið tekin af léttúð eða í flýti, heldur af illri nauðsyn. Í ljósi yfirvofandi verkfalla sé mikilvægt að skera úr um það hvort aðgerðirnar standist lög.
Málið var þingfest í Héraðsdómi Reykjavíkur fyrr í þessum mánuði og aðalmeðferð fer fram á morgun.
Niðurstaðan hafi líklega fordæmisgildi
Hann segir af og frá að foreldrarnir séu með stefnunni að reyna að svipta kennara verkfallsrétti sínum, líkt og formaður Félags leikskólakennara hefur sagt í fjölmiðlum. Enginn efist um verkfallsrétt kennara, en Kristófer bendir á rétturinn sé ekki takmarkalaus.
„Við erum að láta reyna á það hvort rétt sé staðið að þessum verkföllum, við teljum það ekki yfir allan vafa hafið og teljum að útfærslan mismuni okkar börnum og bitni helst á þeim. Þessi útfærsla af verkfalli hefur ekki átt sér stað að mér vitandi á opinberum vinnumarkaði hjá starfsfólki sveitarfélaga áður. Niðurstaðan hefur líklega fordæmisgildi. Ef niðurstaðan verður okkur í hag þýðir það breyta þyrfti framkvæmd verkfallsins. Kennarar, rétt eins og aðrir hefðu samt sem áður sinn verkfallsrétt,“ segir Kristófer.
Hann tekur jafnframt fram að stefnan feli ekki í sér neina gagnrýni á kennara og að enginn sé að saka Kennarasambandið eða kennara um að hafa vitað það fyrirfram að útfærslan væri mögulega ólögmæt.
„Við teljum að það sé ekki yfir allan vafa hafið að þessi útfærsla standist ákvæði laga um kjarasamninga opinberra starfsmanna og við höfum nú gripið til þess örþrifaráðs að fara dómstólaleiðina til að fá úr því skorið.“
Aðeins um fjóra leikskóla að ræða
Um er að ræða hóp foreldra sem eiga börn á þeim fjórum leikskólum þar sem farið var í ótímabundnar verkfallsaðgerðir á síðasta ári; leikskólunum; Drafnarsteini í Reykjavík, Holti í Reykjanesbæ, Ársölum á Sauðárkróki og leikskóla Seltjarnarness.
Alls var farið í verkföll í níu leik-, grunn-, framhalds- og tónlistarskólum á síðasta ári. Aðgerðirnar í leikskólum voru ótímabundnar. Á hinum skólastigunum var um tímabundnar aðgerðir að ræða. Verkfallsaðgerðir á leikskólum stóðu yfir í fimm vikur, eða þar til deiluaðilar gerðu samkomulag um friðarskyldu í lok nóvember. Með því var verkföllum frestað um tvo mánuði, en þau skella aftur á þann 1. febrúar, náist samningar ekki fyrir þann tíma.
Hefur átt frábær samskipti við kennara
Kristófer furðar sig á ummælum Haraldar Freys Gíslasonar, formanns Félags leikskólakennara, en hann sagði það foreldrum til skammar og minnkunar að hafa farið í þessa vegferð. Sagðist jafnframt ekki skilja hvernig foreldrarnir gætu horft í augu kennara barna sinna
„Eins og ég hef áður tekið fram lít ég á foreldra og kennara sem liðsmenn í sama liði. Ég hef átt frábær samskipti og samstarf við leikskólakennara og kennara í gegnum tíðina.“
Þá segir hann Harald hafa reynt að etja foreldrum og kennurum saman og spyr hvert sé markmiðið með því.
„Við erum ekki í neinu stríði við kennara. Við erum hvorki að stefna kennurum svo þeir hætti sinni baráttu né svipta þá verkfallsvopninu. Við viljum bara vera viss um að vopninu sé beitt með réttum hætti.“
Engu svarað og undanþágubeiðnum hafnað
Kristófer segir þá ákvörðun um að stefna Kennarasambandinu ekki hafa verið tekna af léttúð eða í flýti. Hann bendir á að aðgerðirnar hafi aðeins bitnað á fámennum hópi barna og fjölskyldum þeirra og farið framhjá flestum í þjóðfélaginu.
Margir foreldrar hafi sent erindi til forystu KÍ og biðlað til þeirra að endurskoða útfærslu verkfalla með vísan í takmörkuð áhrif þess á viðræður en mikil áhrif á fámennan hóp.
„Umboðsmaður barna vakti í tvígang athygli á þeirri mismunum sem útfærslan leiddi til. Rof varð á margskonar þjónustu sem börn njóta innan leikskóla, t.d. talmeinafræðinga, sálfræðinga, þroskaþjálfa og meira að segja var undanþágubeiðni fyrir fötluð börn var hafnað eins og fjallað var um á mbl.is.“
Í lok desember hafi svo verið send formleg áskorun á KÍ um að breyta útfærslunni, með ítarlegum rökstuðningi, en henni var ekki svarað, að sögn Kristófers. Foreldrar hafi því séð þann eina kost í stöðunni að stefna félaginu og fá úr því skorið hvort útfærslan ætti sér stoð í lögum.
/frimg/1/53/8/1530849.jpg)
Engar persónuupplýsingar birtar
Haraldur sagði fyrir helgi að þegar stefnan yrði birt þá yrði það gert opinbert hvaða foreldrar stæðu að baki henni. Kristófer segir það hins vegar ekki rétt.
Foreldrarnir stofnuðu félag sem gefið var heitið Málsóknarfélag barna, sem er stefnandi í málinu. Einungis heiti þess verði gert opinbert fyrir dómstólum.
„Þá eru það börnin sem eiga réttinn sem verið er að reyna á og það er því þau sem eru félagsmenn málsóknarfélagsins. Það er mjög undarlegt að formaður Félags leikskólakennara gefi í skyn að opinbera eigi upplýsingar um einstaklinga þarna að baki og þar með persónulegar upplýsingar lítilla barna. Við vonum að maður í hans stöðu viti betur en svo þegar kemur að persónuupplýsingum barna,“ segir Kristófer.
Þá bætir hann við að enn sé hægt að hafa samband við félagið og taka þátt eða leggja verkefninu lið. Hægt sé að senda póst á netfangið: leikskolaverkfallsborn@gmail.com.
Líkt og áður sagði fer aðalmeðferð fram á morgun, en málið fær flýtimeðferð fyrir dómstólum og binda foreldrar því vonir við að niðurstaða í málinu liggi fyrir nokkrum dögum eftir aðalmeðferð.
Ræna fólki og neyða í herþjónustu
Óljóst um niðurstöðu styrkjamálsins
Hrossatað losað við Úlfarsfell
Þrír tálbeituhópar sem tala sig saman
„Við treystum því að þetta muni fara vel“
Orkukostnaður sligar garðyrkjuna
„Við erum ekki í neinu stríði við kennara“
Áhyggjuefni ef gos hefst í vondu veðri