Innlent | mbl | 30.1.2025 | 14:55

Hundurinn verður aflífaður eftir helgi

Rottweiler-hundur réðst á konu sem var á gangi á Akureyri. Samsett mynd

Til stendur að lóga Rottweiler-hundi á mánudaginn sem réðst á konu í síðustu viku. Konan axlarbrotnaði í átökunum en hundurinn beit í sundur vöðva og sinar í handlegg konunnar.

Þetta staðfestir Guðríður Friðriksdóttir, sviðsstjóri umhverfis- og mannvirkjasviðs Akureyrarbæjar, í samtali við blaðamann mbl.is.

„Þetta er auðvitað alveg hræðilegt og sorglegt þegar svona gerist.“

„Virðist frekar klippt og skorið“

Akureyrarbæ og Matvælastofnun var tilkynnt um málið í kjölfar árásarinnar en málið hefur verið í rannsókn hjá rannsóknardeild lögreglustjórans á Norðurlandi eystra.

Þjónustufulltrúi lögreglunnar vildi ekki veita upplýsingar um málið eða verkferla lögreglu í slíkum málum.

Sif Sigurðardóttir, héraðsdýralæknir hjá MAST, segir stofnunina hafa verið upplýsta um málið en skipti sér alla jafna ekki af nema grunur leiki á að hundur hafi bitið frá sér til þess að verjast illri meðferð.

„En það hefur ekki verið gert í þessu máli. Þetta virðist frekar klippt og skorið,“ segir Sif.

Rottweiler-hundar ekki bannaðir

Aðspurð segir hún Rottweiler-hunda ekki bannaða og vísar í samþykkt um hundahald í Akureyrarkaupstað.

„Þetta er náttúrulega bara gömul vinnuhundategund.“

Samkvæmt hundasamþykkt Akureyrarbæjar er óheimilt að halda hunda af Pit Bull Terrier, Staffordshire Bull Terrier, Fila Brasileiro, Toso Inu eða Dogo Argentino-tegund.

Auk þess er óheimilt að eiga blendinga af ofangreindum tegundum, blendinga af úlfum og hundum og aðrar tegundir sem hættulegar eða óæskilegar eru að fenginni reynslu eða mati sérfróðra aðila.