Innlent | mbl | 30.1.2025 | 11:42 | Uppfært 12:14

Leggur fram innanhústillögu í kjaradeilu kennara

Ástráður leggur fram tillögu í dag og vonast til og gerir ráð fyrir að eitthvað verði fundað um helgina. mbl.is/Kristinn Magnússon

Ríkissáttasemjari hefur boðað samninganefndir Kennarasambands Íslands og Sambands íslenskra sveitarfélaga á fund klukkan 16 í dag þar sem hann mun kynna innanhústillögu sem starfsfólk embættisins hefur sett saman.

Er það tilraun til að koma deiluaðilum út úr þeim vítahring sem þeir hafa verið fastir í síðustu mánuði, en að öllu óbreyttu hefjast verkfallsaðgerðir kennara á ný á mánudag.

„Svo fá aðilar eitthvað ráðrúm til að skoða það og eftir atvikum verða einhver frekari samtöl vona ég,“ segir Ástráður Haraldsson ríkissáttasemjari í samtali við mbl.is. Hann á því alveg eins von á því að fundað verði áfram um helgina.

Frétt af mbl.is

Staðan þungbær og veldur vonbrigðum

Verið í nánu samráði síðustu daga

Er þessi tillaga þess eðlis að það væri hægt að fresta verkföllum og halda áfram með samtalið?

„Við kynnum tillöguna í dag, þannig við verðum að bíða með það nákvæmlega hvað hún felur í sér. En allavega er búið að vera í nánu samráði við aðila að finna einhverja leið á undanförnum dögum og það er komið að því að kalla þá saman til þess að fara yfir hvað ég legg til, svo sáum við til hvernig það þróast,“ segir Ástráður.

Líkt og fram hefur komið hefur lítill sem enginn framgangur orðið í viðræðunum frá því að samkomulag um friðarskyldu var gert í lok nóvember og verkföllum frestað.

Deiluaðilar hafa ekki hist á formlegum samningafundi frá því á miðvikudaginn í síðustu viku. Þá var reynt til þrautar að finna grundvöll til frekara samtals, án árangurs.

Sá þá ríkissáttasemjari ekki tilefni til að boða til frekari funda, nema eitthvað gæfi tilefni til.

mbl.is/Hari

Verkföll hefjast í 21 skóla á mánudag

Formaður samninganefndar Sambands Íslenskra sveitarfélaga hefur sagt að það þurfi viðhorfsbreytingu af hálfu kennara til að samningar náist. Þeir séu fastir í launakröfum sem ekki sé hægt að koma til móts við.

Formaður Kennarasambands Íslands segir kröfu um jöfnun launa á milli markaða standa óhaggaða. Grundvallaratriði sé að staðið sé við samkomulag frá árinu 2016.

Að öllu óbreyttu hefjast verkfallsaðgerðir á mánudag í fjórtán leikskólum og sjö grunnskólum. Þá hefur Félag framhaldsskólakennara gefið út að farið verði í atkvæðagreiðslu um ótímabundin verkföll í nokkrum framhaldsskólum strax í byrjun febrúar.

Frétt af mbl.is

Í þessum leik- og grunnskólum eru fyrirhuguð verkföll

mbl.is/Eggert Jóhannesson

Setur aðgerðir mögulega í uppnám

Aðalmeðferð í máli foreldra leikskólabarna gegn Kennarasambandi Íslands vegna útfærslu verkfallsaðgerða fór fram í Héraðsdómi Reykjavíkur í gær. Málið fékk flýtimeðferð og verður úrskurður dómara héraðsdóms kveðinn upp á morgun, föstudag.

Foreldrarnir telja útfærslu verkfallsaðgerða KÍ ekki standast lög, þar sem þær hafa eingöngu bitnað á fámennum hópi barna. Verði niðurstaðan foreldrunum í vil má gera ráð fyrir því að það setji boðaðar verkfallsaðgerðir kennara í uppnám.