Innlent | Morgunblaðið | 30.1.2025 | 6:00

Togast á um vistarverur í Alþingishúsi

Þingflokksherbergi sjálfstæðismanna, sem þeir hafa haldið í 84 ár, er málað bláum lit og þar hanga málverk af formönnum og þingforsetum. mbl.is

Þingflokkur Samfylkingar hefur gert kröfu um að fá úthlutað stærsta þingflokksherberginu í Alþingishúsinu í krafti stærðar sinnar, en svo vill til að það er þingflokksherbergi Sjálfstæðisflokks.

Sjálfstæðismenn taka þessu fjarri, segja enga þörf á því að þeir rými þingflokksherbergið og að rofin verði 84 ára söguleg tenging; í þinghúsinu sé að finna fleiri salarkynni sem rúmi mun stærri þingflokka en Samfylkingin hafi yfir að ráða.

Samfylkingin fékk 15 þingmenn kjörna í nýliðnum kosningum en Sjálfstæðisflokkur 14.

Andmæla kröfu Samfylkingar

„Jú, skrifstofustjóri Alþingis sendi mér í upphafi mánaðarins erindi um að Samfylkingin hefði óskað eftir að fá úthlutað stærsta þingflokksherberginu í Alþingishúsinu,“ staðfestir Hildur Sverrisdóttir þingflokksformaður sjálfstæðismanna í samtali við Morgunblaðið.

„Stærsta þingflokksherbergið í Alþingishúsinu er vissulega þingflokksherbergi Sjálfstæðisflokksins, en hann hefur haft það sem þingflokksherbergi sitt í meira en áttatíu ár, frá 1941.“

Hildur kveðst hafa sent Rögnu Árnadóttur skrifstofustjóra Alþingis athugasemdir sínar, þar sem krafa Samfylkingarinnar sé ekki í samræmi við reglur forsætisnefndar um úthlutun þingflokksherbergja.

Reglur voru um það settar fyrir margt löngu, enda gerist það í hverjum kosningum að þingflokkar stækka og minnka án þess að ástæða þyki til þess að úthýsa þeim. Í reglunum segir að almennt sé miðað að því að þingflokkar haldi þingflokksherbergjum sínum nema nauðsyn annarra og stærri þingflokka kalli á breytingar.

Lesa má meira um málið í Morgunblaðinu í dag