Verkföll kennara hefjast á ný á morgun
Setja bókamerki
Samningafundi kennara, ríkis og sveitarfélaga lauk nú um klukkan tíu í kvöld án þess að samningar næðust. Verkfallsaðgerðir kennara hefjast því á ný í fyrramálið og munu ná til fjórtán leikskóla og sjö grunnskóla.
Þetta staðfestir Ástráður Haraldsson ríkissáttasemjari í samtali við mbl.is.
Ástráður lagði fram innanhústillögu í kjaradeilunni á fimmtudag, en hún fól meðal annars í sér að deila um jöfnun launa á milli markaða yrði leyst með virðismati á störfum kennara.
Stjórn Sambands íslenskra sveitarfélaga samþykkti tillöguna á föstudag, en kennarar féllust ekki á hana í þeirri mynd sem Ástráður lagði hana fram. Þeir gerðu kröfu um breytingar á ákveðnum skilmálum, sem voru ræddar í gær og í dag.
Samninganefndir ríkis og sveitarfélaga gátu ekki fallist á þær breytingar.
„Við erum búin að þrautkanna það, en það næst ekki saman,“ segir Ástráður.
Hann telur ekki ástæðu til að boða til annars fundar að öllu óbreyttu.
Líkt og áður sagði hefjast verkfallsaðgerðir kennara á ný í fyrramálið í fjórtán leikskólum og sjö grunnskólum víða um land og munu hafa áhrif á um 5.000 börn og fjölskyldur þeirra. Verkfallsaðgerðir í leikskólum eru ótímabundnar en tímabundnar í grunnskólum.
Þá hefur Félag framhaldsskólakennara gefið út að farið verði í atkvæðagreiðslu um ótímabundnar verkfallsaðgerðir í nokkrum framhaldsskólum strax í byrjun vikunnar.
Óvissustigi aflétt á sunnanverðum Vestfjörðum
Sú eina sem sérhæfir sig í glákuaðgerðum
Funda í Karphúsinu
Tregða í verðbólgunni
Fjölmiðlafólk rekið út
Trump-áhrifin: Minni alþjóðaviðskipti
„Þú selur ekki launþega“