Innlent | mbl | 3.2.2025 | 16:39

Svona er plan ríkisstjórnarinnar

Kristrún Frostadóttir forsætisráðherra kynnti áætlun nýrrar ríkisstjórnar. mbl.is/Eggert Jóhannesson

Frumvarp fjármálaráðherra um stöðugleikareglu verður á dagskrá strax í febrúar og er ætlað að tryggja að fjármál ríkisins styðji við lægri vexti.

Gert er ráð fyrir takmörkuðum útgjöldum í fjáraukalögum og að engin ný útgjöld verði boðuð á árinu án þess að hagræða á móti eða afla aukinna tekna.

Þetta er meðal þess sem fram kom á blaðamannafundi formanna ríkisstjórnarflokkanna sem boðað var til kl. 16 í dag.

Tekið var fram að hagræðingarhópur ríkisstjórnarinnar muni skila tillögum til hagræðingar þann 28. febrúar.

Aðgerðir gagnvart Airbnb og breytingar vegna einingarhúsa

Kristrún Frostadóttir forsætisráðherra sagði ríkisstjórnina boða bráðaaðgerðir í húsnæðismálum.

Þar undir falla aðgerðir til að taka stjórn á Airbnb og annarri skammtímaleigu til ferðamanna, tryggja skilvirka framkvæmd á veitingu hlutdeildarlána, lækka fjármögnunarkostnað hjá húsnæðisfélögum án hagnaðarsjónarmiða, liðka fyrir uppbyggingu einingahúsa með reglugerðarbreytingum og leiða í lög skráningarskyldu leigusamninga til að fá áreiðanlega mynd af þróun leigumarkaðar.

Breytingar á fæðingarorlofskerfinu

Inga Sæland, félags- og húsnæðismálaráðherra, sagði að kjör öryrkja og eldra fólks yrðu bætt.

Lagt verði fram frumvarp um að aldursviðbót örorkulífeyris haldist ævilangt en falli ekki niður þegar öryrki verði 67 ára, jólaeingreiðsla verði greidd til öryrkja og eldra fólks með lágar tekjur, stöðu hagsmunafulltrúa eldra fólks verði komið á og loks standi til að samþykkja á vorþingi lagafrumvarp til að stöðva kjaragliðnun launa og lífeyris.

Fyrstu breytingar á fæðingarorlofskerfinu muni þá birtast í frumvarpi í mars til að bæta hag fjölburaforeldra og lengja fæðingarorlof foreldra sem veikjast á meðgöngu eða eftir fæðingu. Að auki á að tryggja að hækkanir í fæðingarorlofskerfinu gangi til allra foreldra í fæðingarorlofi – óháð fæðingardegi barns – og fæðingarstyrkir námsmanna og fólks utan vinnumarkaðar hækka um 30 þúsund krónur á mánuði.

„Og síðast en ekki síst risastórt velferðar- og mannréttindamál sem ríkisstjórnin leggur fram í mars: Við ætlum að löggilda samning Sameinuðu þjóðanna um réttindi fatlaðs fólks,“ sagði Inga.

Þorgerður Katrín Gunnarsdóttir utanríkisráðherra sagði ríkisstjórnina munu höggva á hnútinn í orkumálum og gera breytingar á sjávarútvegi til að auka gegnsæi og réttlæti.

Strax frumvarp vegna Hvammsvirkjunar

Ríkisstjórnin stefni á að leggja fram að minnsta kosti fjögur stór mál á vorþingi sem snúi að orkuöflun.

Eitt þeirra sé frumvarp strax á fyrstu dögum þingsins til að eyða óvissu um Hvammsvirkjun og aðrar mikilvægar framkvæmdir. Orkuforgangur almennings verði á dagskrá ásamt umfangsmiklu einföldunarfrumvarpi til að hraða og samræma málsmeðferð í leyfisveitingum, án þess að slá af kröfum um umhverfisvernd og almannasamráð.

Þá verði lögð fram rammaáætlun þar sem virkjunarkostir verða flokkaðir í verndarflokk eða nýtingarflokk samkvæmt tillögum verkefnastjórnar rammaáætlunar.

Stór verkefni í sjávarútvegsmálum verði einnig tekin fyrir á Alþingi, meðal annars frumvarp í febrúar sem snúi að gagnsæi og eignarhaldi tengdra aðila á útgerðarfyrirtækjum, frumvarp um strandveiðar og breytingar á veiðigjaldi til að það endurspegli betur raunveruleg aflaverðmæti.

Þá verði undið ofan af breytingum á búvörulögum sem hafa verið dæmdar ólöglegar í héraðsdómi. Gerðir verði nýir fríverslunarsamningar við Indland, Taíland og Chile og samningur við Úkraínu uppfærður. Einnig hyggist ríkisstjórnin ljúka við bókun 35 í vor.

Lagafrumvarp um lagareldi

Stefnt sé enn fremur að því að nokkur stór auðlinda- og atvinnumál verði lögð fram á haustþingi, sem kalli í einhverjum tilfellum á meiri vinnu í ráðuneytum eða samráð við fólk og fyrirtæki.

Til dæmis megi þar nefna lagafrumvarp um lagareldi þar sem gert sé ráð fyrir tímabundnum rekstrarleyfum, afnám á undanþágum frá skattlagningu orkumannvirkja, jöfnun á dreifikostnaði raforku, ný heildarlög um loftslagsmál og síðast en ekki síst nýja samgönguáætlun.

Fækkun ráðuneyta verði lögð fyrir Alþingi þar sem gert sé ráð fyrir að hagræðing af henni nemi u.þ.b. 350 milljónum á ári. Ljúka eigi við sölu Íslandsbanka með gagnsæju og traustu ferli þar sem almenningur hafi forgang.

„Menntamál verða áberandi og þar eru til dæmis boðuð frumvörp um nýtt fyrirkomulag við námsmat grunnskóla, um fjölbreytt framboð á námsgögnum í leik-, grunn- og framhaldsskólum, sem verði gerð gjaldfrjáls í áföngum, og um breytingar á Menntasjóði námsmanna sem snúa meðal annars að því að 20% lána breytist í styrk í lok hverrar annar en 10% við námslok,“ segir í tilkynningu frá stjórnarráðinu í kjölfar blaðamannafundarins.

Sorgarleyfi fyrir foreldra sem missa maka

Með breytingum á lögum um sviðslistir standi einnig til að bæta umgjörð og koma rekstri óperustarfsemi fyrir innan Þjóðleikhússins.

„Vinna er hafin við endurskoðun á styrkjum til einkarekinna fjölmiðla og verður þak á styrkjum til fjölmiðla lækkað strax í vor en styrkirnir framlengdir til eins árs,“ segir í tilkynningunni.

„Nefna má frumvarp um sorgarleyfi fyrir foreldra sem missa maka og frumvarp og um lágmarksskatt á fjölþjóðleg stórfyrirtæki. Ríkisstjórnin hyggst ljúka við heildarendurskoðun á lögum um Jöfnunarsjóð sveitarfélaga og farið verður í fyrsta lið í endurskoðun á lögum um leigubíla sem snýr meðal annars að því að koma aftur á stöðvarskyldu.“

Loks er nefnt að stefnt sé aftur að því að sameina sýslumannsembætti úr níu í eitt án þess að það komi niður á þjónustu á landsbyggðunum.

Frétt af mbl.is

Sameinað embætti á landsbyggðinni

Frétt af mbl.is

Fellur frá sameiningu sýslumannsembættanna

Lögreglu kleift að krefjast farþegaupplýsinga

Lögreglumönnum verði þá fjölgað um 50 strax á þessu ári, eins og mbl.is greindi frá fyrr í dag.

Dómsmálaráðherra muni leggja fram frumvarp strax í febrúar sem geri lögreglu kleift að krefjast farþegaupplýsinga og þá á að gera það heimilt að afturkalla alþjóðlega vernd fyrir einstaklinga sem fremja alvarleg afbrot eða síendurtekin.

„Loks er stefnt á ýmsar umbætur í heilbrigðismálum, fyrir utan sumaropnun meðferðarúrræða. Þar má nefna reglugerðarbreytingar til að draga úr skriffinnsku og vottorðafargani, skyldu til að halda rafrænar sjúkraskrár svo hægt sé að samnýta upplýsingar og breytingar á lögum um neyslurými.

Áhersla ríkisstjórnarinnar á heilbrigðismál mun einnig birtast í fyrstu fjárlögum á haustþingi.“