Skerðingum aflétt: Bættur vatnsbúskapur eftir umhleypingar

Landsvirkjun mun falla frá skerðingum á stórnotendur raforku á suðvesturhluta landsins frá og með morgundeginum, en þar með er öllum skerðingum fyrirtækisins aflétt. Hafði Landsvirkjun tilkynnt fyrst um skerðingar í haust vegna slaks vatnsbúskaps. Náðu skerðingarnar til Suðvesturlands.

Taka átti upp skerðingar á Norður- og Austurlandi, en ákveðið var að fresta þeim fram yfir áramót og í desember tilkynnti Landsvirkjun að ekki væri þörf fyrir þær skerðingar vegna batnandi stöðu.

Hverfandi líkur á skerðingum fram til vors

Í tilkynningu frá Landsvirkjun nú segir að ástæða afléttinga sé batnandi vatnsbúskapur á Þjórsársvæðinu eftir umhleypingar síðustu vikna. „Þá gerir langtímaspá ráð fyrir að hiti og úrkoma verði yfir meðallagi næstu vikur og því hverfandi líkur á að grípa þurfi til frekari skerðinga fram til vors.“

Landsvirkjun útskýrir í tilkynningunni af hverju til skerðinga hafi komið á þessu vatnsári. 

Frétt af mbl.is

Landsvirkjun þarf að grípa til skerðinga

„Landsvirkjun miðar upphaf hvers vatnsárs við 1. október. Staða lóna var með versta móti sl. haust, t.d. var staða Þórisvatns í sögulegu lágmarki, því þótt vætusamt hafi verið á láglendi sl. sumar var þurrt og kalt á hálendinu og innrennsli í lón dræmt. Strax í september var ljóst að grípa þyrfti til skerðinga og hófust þær hjá stórnotendum á suðvesturhluta landsins 24. október sl. Á sama tíma stefndi í skerðingar á norður- og austurhluta landsins undir lok nóvember, en til þeirra skerðinga kom þó aldrei. Hálslón við Kárahnjúkanáði sér á strik í nóvember og hið sama má segja um Blöndulón. Sú bætta staða hafði hins vegar ekki áhrif á skerðingar syðra þar sem flutningskerfi raforku gerir Landsvirkjun ekki kleift að færa nægilega raforku milli landshluta.“

Náði aðeins til viðskiptavina sem höfðu samið um skerðingu

Þá tekur fyrirtækið fram að skerðingarnar hafi aðeins náð til viðskiptavina sem höfðu samið um að orka til þeirra sé skerðanleg þegar staða miðlunarlóna sé lág. „Landsvirkjun hefur staðið við alla samninga um afhendingu forgangsorku til stórnotenda og heildsölu, eins og í öll þau tæpu 60 ár sem orkufyrirtæki þjóðarinnar hefur starfað.“ 

• 1 blogg um fréttina

Bloggað um fréttina

• Torfi Kristján Stefánsson: Úrkomumet í byrjun febrúar!