Réðist á hjón sem kysstust

Egypta nokkrum blöskraði þegar hann sá ungversk hjón kyssast á götu í Kaíró. Réðist hann á fólkið með hníf að vopni og stakk bæði hjónin áður en hann var yfirbugaður.

Ungversku hjónin voru ásamt fleiri ungverskum ferðamönnum á Khan el-Khalili markaðnum í miðborg Kaíró. Að sögn lögreglu særðist fólkið ekki alvarlega.

Árásarmaðurinn er sagður vera 26 ára og eiga við geðræn vandamál að stríða. Lögregla segir að maðurinn hafi reiðst þegar hann sá hjónin láta vel hvort að öðru en í Egyptalandi er slíkt almennt illa séð á almannafæri.

• Blogga um frétt