Konum bannað að vera berbrjósta á ströndum Ítalíu nema liggjandi

Konum hefur verið bannað vera berar að ofan á ítölskum ströndum nema þær liggi. Samkvæmt nýjum reglum verða konur að hylja sig þegar þær ganga um, baða sig í sjónum og spila blak.

Ítalska almenningsbaðasambandið setur reglurnar. Samkvæmt nýju reglunum er líka bannað að spila fótbolta á ströndinni, hengja upp blaut föt til þerris á sólhlífar á ströndinni og drekka áfengi, að því er fram kemur á fréttavef Ananova.

Riccardo Scarselli, forseti sambandsins, segir að hegðun fólks á ströndinni versni sífellt. „Fólk heldur að það geti gert allt sem það vill, bara af því það er komið í sundfötin,“ segir hann.

Þá er fólki líka bannað að lauma sér í sundfötin undir handklæðinu sínu á ströndinni.

„Það er nóg af klefum þar sem fólk getur skipt um föt í og það á að nota þá,“ sagði Scarselli.

• Blogga um frétt