Fjárveiting til Útlendingastofnunar hækkar tímabundið um 225 milljónir króna á næsta ári. Í fjárlagafrumvarpinu fyrir árið 2006 segir, að hækkunin eigi rætur að rekja til þess að vegna alþjóðlegra krafna, einkum frá Alþjóðaflugmálastjórninni, Shengen-samkomulaginu og stjórnvöldum í Bandaríkjunum sé áformað að taka í notkun nýja tegund vegabréfa sem innihalda lífkenni.

Endurnýja þarf vél- og hugbúnað hjá sýslumannsembættum og keyptir sérstakir fingrafaralesarar og nýjar vegabréfabækur, sem innihalda örflögu með upplýsingum um lífkenni handhafa.

Þá verður keyptur búnaður sem gerir kleift að taka upp lífkenni í vegabréfsáritanir og dvalarleyfi. Þar á meðal er sérstakur gagnagrunnur, sem Shengen-löndin munu nota í þessu skyni.

Miðað er við að 40 þúsund vegabréf verði gefin út á næsta ári og verð á hverju vegabréfi verði 1150 krónur. Innkaupakostnaður Útlendingastofnunar verður því um 46 milljónir króna.

Tengdar fréttir

Fjárlagafrumvarp fyrir árið 2006

Skjálfti í þingsalnum

• Atkvæði greidd um fjárlagafrumvarpið
• Umræða um fjárlagafrumvarpið hafin á Alþingi
• Kvartað yfir fjarveru ráðherra við fjárlagaumræðu
• Fjárlagaafgangur eykst um 5,4 milljarða og verður 19,6 milljarðar

» Fleiri tengdar fréttir

• Blogga um frétt