Erlent | mbl | 14.6.2007 | 15:13 | Uppfært 19:58

Bandarískur bær vill banna buxur sem lafa

Rapparinn 50 cent er á meðal þeirra sem vill láta skína í nærhaldið. Ljóst er að hann kæmist ekki upp með slíkt í bænum Delcambre. Reuters

Það mun brátt varða við lög að ganga um í buxum sem hanga það neðarlega við mittið þannig sjá megi í nærföt viðkomandi, þ.e. nái bæjarstjóri einn í Lousiana-ríki í Bandaríkjunum fram vilja sínum.

Bæjarstjórinn segist ætla að staðfesta sem lög tilskipun sem er á þá leið að það verði brot á velsæmislögun að ganga í slíkum buxum - sem sumir hafa viljað kalla „skopparabuxur“. Með athæfinu sé fólk í raun að fletta sig klæðum.

Bæjarráðið í Delcambre samþykkti einróma tilskipunin fyrr í þessari viku, en samkvæmt henni er það glæpur að ganga um í buxum þannig að nærfötin sjáist, segir á fréttavef BBC.

„Ef þú sýnir þitt allra heilagasta verður þú sektaður,“ um 500 dali, sagði bæjarstjórinn, Carol Broussard.

Þá mega þeir sem gerast brotlegir við lögin átt von á því að verða dæmdir í sex mánaða fangelsi.

Broussard segir að þeir sem séu svona til fara ættu í rauninni bara að klæða sig úr buxunum og í kjól.

Ted Ayo, lögmaður bæjarstjórnarinnar, segir tilskipunina snúast um það að það verði bannað að sýna nærfötin á almanna færi.

Sumir bæjarbúar hafa hinsvegar bent á að lafandi buxur séu í tísku á meðal ákveðinna hópa, t.d. meðal þeirra sem hlýða á hip hop tónlist.

Broussard neitaði því hinsvegar að málið snúist um kynþætti. „Hvítt fólk gengur einnig í lafandi buxum,“ sagði hún.