Innlent | Kosningar | mbl | 9.11.2024 | 20:00

Hrifnari af þjóðlegum skuldbindingum

„Við erum mun hrifnari af þjóðlegum skuldbindingum en alþjóðlegum skuldbindingum,“ segir Snorri Másson, oddviti Miðflokksins í Reykjavíkurkjördæmi suður.

„Við viljum lifa í góðu og samheldnu samfélagi, sem ég tel að við þurfum að gæta okkar á þessum tímum að breytist ekki allt of hratt.“

Nefnir Snorri innflytjendamálin, máli sínu til stuðnings, sem hann segir geta fylgt vandamál og mjög flókin úrlausnarefni fyrir stjórnmálin og samfélagið allt. Snorri ábyrgist að taka það alvarlega.

Hvatinn minni með hverju ári

Hann er málfræðingur og vill taka málefni tungumálsins alvarlega. Hvatinn fyrir aðflutta til að tileinka sér tungumálið verður að hans mati minni með hverju árinu, sem hann segir geta undið upp á sig í spíral þar sem engin ástæða verði til að halda í íslenskuna því lýðfræðilegir hvatar verði ekki fyrir hendi.

„Þetta er allt í senn viðhorfsvandi, kerfisvandi og vandi sem stjórnmálin þurfa núna að taka utan um.“