Punxsutawney Phil spáir löngum vetri

Múrmeldýrið Phil í bandaríska bænum Punxsutawney spáði því í morgun að sex vikur að minnsta kosti væru enn eftir að vetrinum en í dag er svonefndur múrmeldýradagur í bænum. Þjóðtrúin segir, að ef múrmeldýr í hýði sínu sjái skugga sinn 2. febrúar muni veturinn dragast á langinn. Múrmeldýradagurinn hefur verið haldinn hátíðlegur í 117 ár í Punxsutawney og í 93 skipti hefur dýrið séð skuggann.

Bill Deeley, útfararstjóri staðarins, klæddur í kjólföt og pípuhatt, dró Phil undan trjárót og lýsti spádómi múrmeldýrsins. Siður þessi er rakinn til þýskra innflytjenda á 19. öld en kaupsýslumenn nútímans hafa gert sér mat úr frægð múrmeldýrsins. Ávallt er mikið um dýrðir í Punxsutawney þennan dag og mikill mannfjöldi kemur ávallt til bæjarins, þar sem um 6700 manns búa. Í fyrra komu um 40 þúsund gestir á hátíðina og sungu og dönsuðu af list en í ár voru gestirnir mun færri enda virkur dagur. Þar ætla þó sjö brúðhjón að gifta sig í tilefni dagsins.

„Það skiptir okkur engu þótt hann sjái skuggann sinn," sagði Bill Cooper, formaður múrmeldýraklúbbs Punxsutawney. „Í dag höldum við hátíð."

Orðstír múrmeldýrsins Phils óx mjög þegar kvikmyndin Múrmeldýradagurinn var gerð árið 1993.

• Blogga um frétt