Christina Aguilera að missa hárið?

Myndir, sem teknar voru af bandarísku söngkonunni Christina Aguilera þegar hún yfirgaf veitingahús í Los Angeles nýlega, hafa vakið upp umræður um að hún kunni að vera að missa hárið. Myndirnar eru sagðar sýna greinilegan hárlausan blett í hægri hlið höfuðsins. Aguilera, sem er ljóshærð, hefur að undanförnu skartað hrafnsvörtum lokkum og ýmsum undarlegum hágreiðslum og segja sérfræðingar að þessar hártilraunir söngkonunnar kunni að hafa valdið því að hárið detti af henni.

Haft er eftir hárlitunarsérfræðingnum Peter Kingsley að hárlengingar geti leitt til skallabletta og einnig geti fléttur valdið slíkum blettum ef togað sé of fast í það. Hins vegar vaxi hár, sem þannig dettur af, yfirleitt aftur.

Fleiri poppstjörnur virðast eiga við svipuð vandamál að stríða. Þannig virðast nýlegar myndir af Victoriu Beckham benda til að hún hafi misst hár á blettum, að því er virðist vegna hárlengingar.

• Blogga um frétt