Hjólreiðafólk fái skattafslátt

Yfirvöld í Noregi eru að velta því fyrir sér að veita skattafslátt þeim, sem hjóla í vinnuna og skilja bílinn eftir heima. Er samgönguráðuneytið að vinna að þessu og kallar "samræmdu reiðhjólaáætlunina".

"Hugmyndin er að gera hjólreiðar eftirsóknarverðar og öruggar," sagði Anders Dalen, starfsmaður ráðuneytisins, en auk þess að lækka skatta á hjólreiðafólki á að afnema virðisaukaskatt af reiðhjólum. Áætlað er, að lagning hjólreiðastíga verði stóraukin, þeir merktir vel og ruddir tafarlaust á veturna. Þá á að verða nóg af stæðum fyrir hjólin og hjólreiðafólki jafnvel gefinn aukinn réttur í umferðinni.

Ósló. AFP.