Karl Gústaf Svíakóngur vill prinsinn frekar en prinsessuna

Tuttugu og þremur árum eftir að lögum um erfðarétt við sænsku krúnuna var breytt í Svíþjóð er Karl Gústaf XVI konungur Svíþjóðar ósáttur við að elsta barn hans, Viktoría prinsessa, eigi að taka við krúnunni af honum en ekki sonurinn, Karl Filipus prins. Lögunum var breytt þannig að elsta barn taki við krúnunni en ekki sonurinn eins og verið hefur öldum saman.

Viktoría prinsessa nýtur almennrar hylli í Svíþjóð og almenningur virðist ekki í vafa um að hún sé verðugur arftaki föður síns sem þjóðhöfðingi. En Karl faðir hennar er annarrar skoðunar. Hann viðraði þessar skoðanir sínar í viðtali við sænska sjónvarpsstöð um helgina þegar hann var spurður hvort hann væri enn mótfallinn gildandi lögum: „Að sjálfsögðu. Það er einfalt. Stjórnarskrárákvæði sem er afturvirkt er óviðeigandi.“

Talsmaður konungsfjölskyldunnar, Elisabeth Tarras-Wahlberg, leggur áherslu á að konungurinn sé samt sem áður afar ánægður með hvernig Viktoría sinni konunglegum skyldum sínum.

• Blogga um frétt