Norskukunnátta skilyrði

Norska ríkisstjórnin hefur nú til athugunar að setja það sem skilyrði fyrir ríkisborgararétti í Noregi, að viðkomandi tali norsku. Kom þetta fram í Aftenposten í gær.

Kristin Ørmen Johnsen ráðuneytisstjóri sagði í viðtali við blaðið, að þetta mál yrði tekið til gaumgæfilegrar athugunar. Skoðanir manna hefðu breyst mikið að undanförnu og þá aðallega vegna þess hve illa hefði gengið að aðlaga marga innflytjendur norsku samfélagi.

Kristin sagði, að þar fyrir utan ættu innflytjendur ekki að fá styrk frá sveitarfélögum, heldur ríkinu, og yrðu þá skyldaðir til að fara í starfsþjálfun og sækja námskeið í máli og menningu landsins.