Farsímar sagðir geta verið smitberar

Farsímar geta verið smitberar ef ekki er varlega farið. Breska blaðið Daily Mail hefur eftir Joanna Verran, prófessor í veirufræði við háskólann í Manchester, að farsímarnir séu bakteríugildrur því þeir séu gjarnan geymdir í buxnavösum eða töskum og þar séu kjöraðstæður fyrir sýkla.

„Maður notar oft farsíma og heldur þeim við andlitið. Símarnir komast einnig í snertingu við fleiri líkamshluta og á þeim eru fleiri bakteríur en á salernissetum," segir Verran.

Fæstir þurrka af símum sínum eftir að hafa notað þá og þegar símarnir eru síðan geymdir á hlýjum stað myndast kjöraðstæður fyrir bakteríur á borð við gula stafílókokka, sem eru á húð fólks.

Sænskur prófessor í örveirufræði segir hins vegar að of mikið sé gert úr þessari hættu. Kossar séu mun áhrifaríkari aðferð við að flytja bakteríur milli fólks.

• Blogga um frétt