KRISTJÁN STEFÁNSSON

Kristján Stefánsson húsgagnasmíðameistari fæddist á Akureyri 2. ágúst 1920. Hann lést á hjúkrunarheimilinu Seli á Akureyri 28. janúar síðastliðinn. Foreldrar hans voru Stefán Jónasson, skipstjóri og útgerðarmaður, f. 13. sept. 1881, d. 22. jan. 1982, og Guðrún Gíslína Friðriksdóttir, f. 29. júlí 1881, d. 8. janúar 1980.

Systkini Kristjáns eru Jónas, f. 3. jan. 1919, d. 8. apríl 1937, Hugrún, f. 10. júní 1917, d. 7. apríl 2005, og Hanna, f. 2. ágúst 1920.

Eiginkona Kristjáns var Kristín Jensdóttir, f. 29. júní 1921, d. 4. apríl 2004. Þau gengu í hjónaband 8. nóv. 1941.

Börn Kristjáns og Kristínar eru a) Guðrún Gíslína, f. 10. maí 1944, maki Antonio Orpinell iðnaðarverkfræðingur. Þau búa á Spáni, börn þeirra eru Christina, Antonio David og Alexander. b) Kristján, f. 11. júlí 1963, maki Sigrún Guðmundsdóttir. Þau búa í Frakklandi, börn þeirra eru Ágústa og Tómas. Fyrir átti Kristján soninn Kristján Jens. Barnabarnabörn Kristjáns eru sex talsins.

Kristján ólst upp í foreldrahúsum í Strandgötu 43 á Akureyri. Stundaði nám í Barnaskóla Akureyrar og Iðnskólanum á Akureyri. Á unglingsárum stundaði Kristján sjómennsku hjá föður sínum. Hugur hans stóð þó til annarra starfa, hann gerði húsgagnasmíð að sínu ævistarfi og nam iðn sína hjá Ólafi Ágústssyni húsgagnasmíðameistara og lauk sveinsprófi árið 1940. Kristján og Kristín byggðu sér heimili við Hríseyjargötu 10 þar sem þau bjuggu til ársins 2003 er þau fluttust í Víðilund 24. Kristján var vandvirkur og hafði næmt auga fyrir öllu sem var fallegt og vel gert. Skaplyndi Kristjáns var rómað og hann hafði unun af því að gera öðrum greiða.

Útför Kristjáns fer fram frá Akureyrarkirkju í dag og hefst athöfnin klukkan 13.30.