Robert Prosinecki, þjálfari karlalandsliðs Svartfjallalands, segir að fram undan sé erfiður leikur gegn góðu liði Íslands í Þjóðadeildinni í fótbolta á föstudagskvöldið.
Liðin mætast á Laugardalsvellinum í fyrstu umferð keppninnar en hin tvö liðin í riðlinum eru Tyrkland og Wales. Sigurlið riðilsins vinnur sér sæti í A-deild en neðsta liðið fellur niður í C-deild.
„Ísland er með hörkulið sem notar leikaðferðina 4-4-2 og vann England í vináttulandsleik í sumar. Leikmennirnir eru grimmir og sterkir, sérstaklega þegar þeir spila á heimavelli,“ sagði Prosinecki við fjölmiðla í Podgorica áður en liðið hélt af stað til Íslands.
„Margir íslensku leikmannanna spila með sterkum félagsliðum og þeir sýndu líka sín gæði í umspilinu fyrir EM í vor, jafnvel þó þeir hefðu að lokum verið slegnir út af Úkraínumönnum.
En það eru líka veikleikar í íslenska liðinu og við munum reyna að nýta okkur þá,“ sagði Prosinecki sem er 55 ára gamall og var í stóru hlutverki í liði Króatíu í kringum síðustu aldamót, þegar liðið vann til bronsverðlauna á HM, og þá spilaði hann m.a. með bæði Real Madrid og Barcelona.