Hinn 19 ára gamli Arda Güler æfði ekki með liðsfélögum sínum í tyrkneska landsliðinu í gær en hann hefur verið að glíma við meiðsli.
Er þátttaka hans gegn Íslandi í Þjóðadeildinni í kvöld því í óvissu. Güler er leikmaður Real Madrid og bera Tyrkir miklar vonir til hans.
Güler fór meiddur af velli í markalausu jafntefli Tyrklands og Wales í sömu keppni á föstudagskvöld og æfði ekki í gær.
Vincenzo Montella þjálfari Tyrklands útilokaði þó ekki þátttöku Güler er hann svaraði spurningum blaðamanna á keppnisvellinum í Izmir í gær.