Glæsilegur sigur Íslands í Svartfjallalandi

Ísland hafði betur gegn Svartfjallalandi, 2:0, á útivelli í Þjóðadeild karla í fótbolta í Niksic í Svartfjallalandi í kvöld. Ísland er nú með sjö stig í riðlinum en Svartfjallaland er enn án stiga.

Í hinum leik riðilsins gerðu Wales og Tyrkland markalaust jafntefli. Ísland mætir Wales á þriðjudaginn næstkomandi í úrslitaleik um 2. sæti riðilsins sem tryggir umspil um sæti í A-deildinni. 

Heimamenn fengu fyrsta færið á 4. mínútu er Vladimir Jovovic átti fast skot rétt utan teigs sem Hákon Rafn Valdimarsson gerði mjög vel í að verja.

Ísland fékk hins vegar besta færi hálfleiksins á 11. mínútu þegar Orri Steinn Óskarsson slapp einn í gegn og renndi boltanum rétt framhjá nærstönginni.

Íslenska liðið varð fyrir áfalli á 20. mínútu þegar Aron Einar Gunnarsson fór af velli vegna meiðsla.

Í kjölfarið kom góður kafli hjá Svartfjallalandi og Marko Bakic kom boltanum í netið á 23. mínútu eftir tvær glæsilegar markvörslur frá Hákoni en Bakic var í rangstöðu og markið taldi ekki.

Nikola Krstovic átti skot yfir í kjölfarið og Adam Marusic bylmingsskot rétt framhjá. Þess á milli átti Arnór Ingvi Traustason hættulegt skot en boltinn fór rétt framhjá færstönginni.

Jóhann Berg Guðmundsson komst svo í fínt færi á lokamínútu fyrri hálfleiks en hann setti boltann framhjá.

Staðan í hálfleik var því markalaus, þrátt fyrir fín færi beggja liða.

Nikola Krstovic fékk fyrsta góða færi seinni hálfleiks en hann lagði boltann framhjá úr hættulegri stöðu rétt utan teigs eftir sókn upp vinstri kantinn á 54. mínútu.

Næstu mínútur voru rólegri og var staðan enn markalaus eftir 70. mínútna leik.

Það breyttist á 74. mínútu því þá skoraði Orri Steinn Óskarsson með huggulegri afgreiðslu í teignum eftir að varamaðurinn Mikael Egill Ellertsson skallaði boltann á hann í teignum.

Íslenska liðið lét það ekki nægja því varamaðurinn Ísak Bergmann Jóhannesson skoraði annað markið á 89. mínútu er hann afgreiddi boltann glæsilega í netið vinstra megin í teignum eftir góðan sprett frá Orra Steini og svo sendingu frá Andra Lucas Guðjohnsen.

Reyndist það síðasta mark leiksins og íslenska liðið fagnaði góðum útisigri.