Byrjað viku fyrr í Bestu deild kvenna

Keppni í Bestu deild kvenna í fótbolta árið 2025 hefst fyrr en nokkru sinni áður en fyrstu tveir leikirnir eiga að fara fram 15. apríl, samkvæmt drögum að niðurröðun sem KSÍ birti í dag.

Það er viku fyrr en á síðasta ári þegar keppni í deildinni hófst 21. apríl.

Fyrstu umferðina á að leika 15. og 16. apríl, þriðjudag og miðvikudag fyrir páska, og aðra umferðina í vikunni á eftir.

Íslandsmeistarar Breiðabliks taka á móti Stjörnunni í öðrum af tveimur fyrstu leikjunum og nýliðar Fram leika sinn fyrsta leik í efstu deild kvenna í 37 ár á sama tíma, gegn Þrótti í Reykjavíkurslag.

Þá spilar Austfjarðaliðið FHL sinn fyrsta leik í sögunni í efstu deild miðvikudaginn 16. apríl þegar það heimsækir Tindastól til Sauðárkróks.

Upphafsleikur tímabilsins, Meistarakeppni KSÍ, þar sem Íslandsmeistarar Breiðabliks mæta bikarmeisturum Vals, fer fram föstudagskvöldið 11. apríl á Kópavogsvelli.

Fyrstu umferðirnar í Bestu deild kvenna eru sem hér segir:

Þriðjudagur 15. apríl:
18.00 Breiðablik - Stjarnan
18.00 Þróttur R. - Fram

Miðvikudagur 16. apríl:
18.00 Tindastóll - FHL
18.00 Víkingur  R. - Þór/KA
18.00 Valur - FH

Mánudagur 21. apríl:
14.00 FHL - Valur
17.00 Þór/KA - Tindastóll

Þriðjudagur 22. apríl:
18.00 Þróttur R. - Breiðablik
18.00 Fram - FH
18.00 Stjarnan - Víkingur R.

Niðurröðun Bestu deildar kvenna

Síðasta umferðin í hefðbundinni deildarkeppni fer fram laugardaginn 20. september.

Síðustu umferðirnar þar sem efstu sex liðin mætast innbyrðis, sem og fjögur neðstu liðin, eru leiknar frá 27. september til 18. október.

• Blogga um frétt