Rudi Völler, yfirmaður knattspyrnumála hjá knattspyrnusambandi Þýskalands, hljóp á sig á blaðamannafundi á EM í dag þegar hann kjaftaði frá því að varnarmaðurinn Waldemar Anton muni ganga til liðs við Dortmund frá Stuttgart. Hvorugt félagið hefur gefið nokkuð út um yfirvofandi félagaskipti.
Starfsmaður sambandsins greip inn í og sagði Völler ekki hafa ætlað sér að ljóstra upp leyndarmálinu. Völler sagðist hafa lesið einhverstaðar að Anton væri á leið til Dortmund.
„Ég er pínu gamaldags. Af og til les ég blöðin og ég held að ég hafi lesið einhverstaðar að Anton væri að skipta um félag. Sjáum til hvort ég hafi rétt fyrir mér eða ekki,“ sagði Völler.