Barnabás Varga, sóknarmaður Ungverjalands, hefur verið útskrifaður af sjúkrahúsi í Stuttgart í Þýskalandi eftir að hann fékk þungt höfuðhögg í leik liðsins gegn Skotlandi í A-riðli Evrópumóts karla í fótbolta á sunnudagskvöld.
Varga kinnbeinsbrotnaði þegar hann og Angus Gunn, markvörður Skotlands, skullu harkalega saman og hlaut aðhlynningu í sjö mínútur á vellinum í Stuttgart.
Hann gekkst undir skurðaðgerð á sjúkrahúsinu sem gekk vel, var útskrifaður í morgun en þátttöku hans á EM er lokið. Ungverjaland á enn möguleika á að komast áfram í 16-liða úrslit en það kemur í ljós í dag þegar keppni í E og F-riðli lýkur.
„Takk fyrir öll skilaboðin. Það er gott að vera kominn aftur heim. Núna þarf ég að hvíla mig í nokkrar vikur.
Eftir það einblíni ég á að jafna mig. Ég er þegar búinn að skoða hvað gerðist, ég er ekki taugaveikluð týpa,“ sagði Varga í myndskeiði sem félagslið hans, Ferencváros, birti á heimasíðu sinni í dag.