Þjóðverjinn Toni Kroos er kokhraustur fyrir leik Þýskalands gegn Spáni í átta liða úrslitum Evrópumótsins í fótbolta í Stuttgart á föstudaginn kemur.
Kroos er að leika sína síðustu leiki á ferlinum en hann hefur ákveðið að leggja skóna á hilluna eftir Evrópumótið.
Kroos sagði á blaðamannafundi í dag að leikurinn á föstudaginn yrði ekki hans síðasti. Þá bætti hann við að hann hlakki til að sjá blaðamennina aftur fyrir undanúrslitin.
„Leikurinn á föstudaginn verður ekki minn síðasti. Við munum hittast aftur og ég hlakka til þess,“ sagði Þjóðverjinn.
Spænski framherjinn Joselu, fyrrverandi liðsfélagi Kroos hjá Real Madrid, sagði fyrr í dag að vonandi myndi Spánn láta Kroos hætta að spila fótbolta.